२९ असार २०८३, सोमबार
नेपाली कांग्रेसले पार्टीको अर्को समूहसँगको संवादलाई अघि बढाउने भएको छ ।
बुधबार बसेको केन्द्रीय कार्यसम्पादन समिति बैठकले विशेष महाधिवेशनका कारण असन्तुष्ट बनेका वरिष्ठ नेताहरू‚ पार्टीका पूर्व पदाधिकारीसँगको संवादलाई अघि बढाउने निर्णय गरेको हो ।
यसका लागि बैठकले सभापति गगनकुमार थापालाई जिम्मेवारी दिएको छ ।
बैठकबारे जानकारी दिँदै कांग्रेस प्रवक्ता देवराज चालिसेले असन्तुष्टहरुलाई संवादमा ल्याउने र उनीहरूको कुरा सुन्ने संस्थापन पक्षको जिम्मेवारी भएको बताए ।
सोही जिम्मेवारीलाई पूरा गर्न सभापति थापालाई बैठकले अधिकार दिएको उनले बताए ।
‘१५ औं महाधिवेशनमा जाँदै गर्दा केही असन्तुष्ट साथीहरू देखिनुभएको छ । पुराना पदाधिकारी र महत्त्वपूर्ण साथीहरू पनि हुनुहुन्छ‚’ उनले भने‚ ‘संवाद र सहकार्य गर्ने जिम्मेवारी त संस्थापनकै हो नि ! त्यसैले छलफल गर्नका लागि सभापति गगनकुमार थापालाई अधिकार दिएका छौं ।ֹ’
