राष्ट्रिय खेलकुद परिषद् (राखेप) अन्तर्गत तालिम तथा प्रशिक्षण विभागको आयोजनामा हाइ लेभल स्पोर्ट्स सेमिनार बिहीबारदेखि सातदोबाटोस्थित अन्तर्राष्ट्रिय खेलकुद परिसरमा शुरू भएको छ ।

सेमिनारको औपचारिक उद्घाटन भने राखेपका सदस्य–सचिव रामचरित्र मेहताले शुक्रबार गर्ने आयोजकले जनाएको छ । सेमिनारमा राखेपमा कार्यरत विभिन्न १२ खेलका ३० प्रशिक्षक सहभागी छन् ।

विभिन्न खेलका प्रशिक्षकलाई सुशीलनरसिंह राणाले एप्लाइड सायन्स, जगदीश भट्टले मोटिभेसन र स्पोर्ट्स म्यानेजमेन्ट, सञ्जय महर्जनले स्पोर्ट्स न्युट्रेसन तथा लक्ष्मण अधिकारीले बायो मेकानिकल सम्बन्धी ज्ञान दिनेछन् ।

कूल एक सय पूर्णाङ्कको असेस्मेन्ट हुनेछ । त्यसमा मल्टिपल च्वाइस प्रश्न ७५ अंक, प्राक्टिकलमा १५ अंक, विषयगतमा पाँच अंक र आन्तरिकमा पाँच अंक छुट्याइएको छ । सेमिनार वैशाख १२ गतेसम्म चल्ने छ ।