अमेरिकी राष्ट्रपति डोनाल्ड ट्रम्पले इजरायल र लेबनानबीच १० दिने युद्धविरामको घोषणा गरेका छन् । यो अचानक भएको घोषणाले इजरायली जनता मात्र नभई इजरायलको सुरक्षा क्याबिनेट समेत आश्चर्यमा परेको छ।

युद्धविराम लागू हुनुभन्दा केही घण्टा अघिसम्म पनि इजरायलको उत्तरी क्षेत्रमा लेबनानबाट आएका रकेटहरूका कारण साइरन बजिरहेका थिए। अचानक गरिएको यो युद्धविरामको घोषणाप्रति इजरायली नागरिकहरूले तीव्र असन्तुष्टि र आशंका व्यक्त गरेका छन्। कतिपयले यसलाई सरकारको धोकाको रूपमा लिएका छन् भने कतिपयले हिजबुल्लाहलाई पूर्ण रूपमा निशस्त्र नपारी युद्ध रोक्नु गलत भएको बताएका छन्।

प्रधानमन्त्री बेन्जामिन नेतन्याहुले यो युद्धविरामलाई ऐतिहासिक शान्ति सम्झौताको अवसर भन्दै बचाउ गरेका छन्। यद्यपि, उनले इजरायल लेबनानको सीमा क्षेत्रबाट तत्काल नहट्ने र आफ्नो सुरक्षाका लागि आवश्यक कदम चाल्ने अधिकार सुरक्षित राखेको प्रष्ट पारेका छन् । 

इजरायली सञ्चारमाध्यमका अनुसार, नेतन्याहुले सुरक्षा क्याबिनेटको बैठक मात्र ५ मिनेटको पूर्वसूचनामा बोलाएका थिए भने मन्त्रीहरूलाई मतदान गर्ने मौका समेत दिइएको थिएन। पूर्व सैन्य प्रमुख गाडी आइजनकोटले नेतन्याहुले सैन्य उपलब्धिलाई कूटनीतिक सफलतामा बदल्न नसकेको र अमेरिकी दबाबमा झुकेको आरोप लगाएका छन् । 

हालैको एक सर्वेक्षण अनुसार करिब ८० प्रतिशत इजरायलीहरू हिजबुल्लाहमाथिको आक्रमण जारी राख्ने पक्षमा थिए। धेरै इजरायलीहरूले यस युद्धविरामलाई अमेरिकी राष्ट्रपति ट्रम्पको स्वार्थ र दबाबको परिणामका रूपमा हेरेका छन्।

युद्धविराम लागू भएसँगै लेबनानमा विस्थापित भएका मानिसहरू आफ्नो घर फर्कन थालेका छन् भने सीमा क्षेत्रमा अझै पनि तनावपूर्ण शान्ति कायम छ।