प्रहरीको केन्द्रीय अनुसन्धान ब्यूरो (सीआईबी)ले तत्कालीन किष्ट बैङ्क घोटाला प्रकरणमा फरार टेलर हेड रोहितलाल श्रेष्ठलाई पक्राउ गरेको छ ।

उक्त बैंकको नक्कली कागजात, छाप, बैंक कर्मचारी र सुरक्षा गार्डसमेत तयार गरी बैंकलाई झुक्याई हानी नोक्सानी गरेको मुद्दामा सर्वोच्च अदालतबाट २०८० असोज १५ गते दुई वर्ष कैद सजाय तोकिएका उनलाई आज महाराजगन्जबाट पक्राउ गरिएको हो ।

अदालतले उनलाई १३ लाख ३३ हजार ३३३ जरिवानासमेत गरेको थियो ।

सो बैङ्कको ठमेल शाखामा जुनियर असिस्टेन्ट पदमा कार्यरत उनले टेलर हेडको जिम्मेवारीमा रहँदा उक्त घोटाला गरेको अनुसन्धानबाट खुलेको छ ।

निज श्रेष्ठलाई फैसला कार्यान्वयनको लागि काठमाडौं जिल्ला अदालतमा उपस्थित गराइएको ब्यूरोका प्रवक्ता शिवकुमार श्रेष्ठले जानकारी दिए ।