२० असार २०८३, शनिबार
इरान र अमेरिकाबीचको तनावपूर्ण अवस्थाबीच युद्ध अन्त्यका लागि पाकिस्तानको मध्यस्थता प्रयास तीव्र बनेको छ ।
इरानका विदेशमन्त्री अब्बास अराघचीले पाकिस्तानका सशस्त्र बल प्रमुख असीम मुनीरसँग शनिबार भेट गरी युद्धविरामपछिका पछिल्ला घटनाक्रम तथा सम्भावित समाधानका उपायबारे छलफल गरेका छन् ।
भेटपछि जारी वक्तव्यअनुसार अराघचीले युद्ध अन्त्यका सम्बन्धमा इरानका दृष्टिकोण र विचार प्रस्तुत गरेका छन् । पाकिस्तानले शान्ति प्रक्रियामा मध्यस्थकर्ताको भूमिका निरन्तर निभाउने प्रतिबद्धता जनाएको छ ।
अराघची व्यापक प्रस्तावसहित पाकिस्तान पुगेको बताइए पनि त्यसका विस्तृत विवरण सार्वजनिक गरिएको छैन । उक्त प्रस्ताव पाकिस्तानमार्फत अमेरिकासम्म पुर्याइने सम्भावना रहेको विभिन्न स्रोतहरूले जनाएका छन् । यद्यपि, अमेरिकी प्रतिनिधिहरू स्टिभ विटकोफ र जारेड कुशनर वार्ताका लागि प्रस्थान गरेका छन् वा छैनन् भन्नेबारे स्पष्ट पुष्टि भएको छैन ।
इरानी अधिकारीहरूले अमेरिका भेट्ने कुरा अराघचीको भ्रमणको मुख्य उद्देश्य नभएको दाबी गरे पनि इरानले नयाँ प्रस्ताव अघि सार्न खोजिरहेको संकेत देखिएको छ । तेहरानबाट प्राप्त जानकारीअनुसार केही कट्टरपन्थी धारले आणविक मुद्दालाई वार्ताको एजेन्डामा समावेश नगर्ने अडान राखेका छन्, जुन अघिल्लो चरणको वार्तामा विवादको प्रमुख कारण बनेको थियो ।
यसैबीच, पाकिस्तानको परराष्ट्र मन्त्रालयले उपप्रधान तथा परराष्ट्रमन्त्री इशाक डारको अध्यक्षतामा बसेको बैठकले क्षेत्रीय घटनाक्रमको समीक्षा गरेको जनाएको छ । बैठकमा डारले इरान–अमेरिका वार्तामा सहजीकरण गर्दै क्षेत्रीय तथा विश्व शान्तिका लागि पाकिस्तान प्रतिबद्ध रहेको दोहोर्याएका छन् ।
इस्लामावादमा सुरक्षा सतर्कता कायमै रहेको र अमेरिका–इरानबीच वार्ता हुने आशा अझै जीवित रहेको संकेत देखिएको छ । परराष्ट्र मन्त्रालयले मध्यस्थता प्रक्रियासम्बन्धी अनौपचारिक वा अज्ञात स्रोतका सूचनाप्रति सावधानी अपनाउन आग्रह गर्दै सञ्चारमाध्यमलाई आधिकारिक जानकारीमा मात्र आधारित हुन अनुरोध गरेको छ ।
