भारतलाई विश्वकै प्रविधि केन्द्र बनाउने लक्ष्यका साथ अमेरिकी टेक जायन्ट गुगलले विशाखापट्टनममा आफ्नो सबैभन्दा ठूलो आर्टिफिसियल इन्टेलिजेन्स (एआई) हबको निर्माण कार्य शुरू गरेको छ। संयुक्त राज्य अमेरिका बाहिरको यो सबैभन्दा ठूलो एआई पूर्वाधार परियोजना हो, जसले भारतको डिजिटल अर्थतन्त्रमा १५ अर्ब डलरको वैदेशिक लगानी भित्र्याएको छ। 

एक विशेष समारोहबीच महत्वाकांक्षी डाटा सेन्टर हबको शिलान्यास गरिएको हो, जसले आन्ध्र प्रदेशलाई विश्वव्यापी एआई इकोसिस्टमको एक प्रमुख केन्द्रको रूपमा स्थापित गर्नेछ।

यो परियोजना एडानी कनेक्ट्स र एयरटेलजस्ता प्रमुख भारतीय कम्पनीहरूको साझेदारीमा विकसित भइरहेको छ। धेरै वर्ष लगाएर सम्पन्न हुने यस हबमा गिगावाट स्केलको कम्प्युटिङ क्षमता रहनेछ। यसले ठूला स्तरका एआई मोडेलहरूको तालिम र व्यावसायिक प्रयोगका लागि आवश्यक पर्ने उच्च क्षमताको शक्ति प्रदान गर्नेछ। 

यस परियोजनाले केवल प्रविधि मात्र नभई स्थानीय स्तरमा ठूलो संख्यामा रोजगारी सिर्जना गर्ने र क्षेत्रीय आर्थिक विकासमा आमूल परिवर्तन ल्याउने अपेक्षा गरिएको भारतीय सञ्चार माध्यमहरूले जनाएका छन् । 

गुगलले केन्द्रलाई वातावरणमैत्री बनाउन नवीकरणीय ऊर्जा र ऊर्जा भण्डारण प्रणालीमा आधारित 'ग्रिन डाटा सेन्टर' को अवधारणा अपनाएको छ। विश्वभर एआईमा प्रतिस्पर्धा बढिरहेका बेला गुगलको यो कदमले भारतलाई प्रविधि क्षेत्रको 'पावरहाउस' बनाउन महत्वपूर्ण भूमिका खेल्ने विज्ञहरूको विश्लेषण छ ।