महिला फूटबलको विकास गर्दै खेलाडी उत्पादन गर्ने उद्देश्यसहित बुटवलमा महिला फूटबल प्रतियोगिता हुने भएको छ ।

बुटवलका क्रियाशील बीस पचहत्तर युवा क्लबले यही वैशाख २६ गतेदेखि दोस्रो उपमेयर कप महिला फूटबल प्रतियोगिता गर्न लागेको हो ।

बुटवल उपमहानगरपालिका–७ स्थित सिद्देश्वरी खेल मैदानमा हुने प्रतियोगितामा राष्ट्रिय स्तरका ८ टिमको सहभागिता हुने क्लबका अध्यक्ष सुरेन्द्र थापाले जानकारी दिए । ‘हामीले गत वर्षदेखि महिला प्रतियोगिता गर्न थालेका छौं,’ अध्यक्ष थापाले भने, 'यस वर्षबाट पुरस्कार राशि पनि बढेको छ । उपाधि जित्ने टोलीले दुई लाख ५० हजार पुरस्कार प्राप्त गर्नेछ भने उपविजेताले १ लाख २५ हजार प्राप्त गर्नेछ ।’

जेठ २ गतेसम्म चल्ने प्रतियोगितामा ट्रिनिटी क्लब वालिङ (स्याङजा), पदमा स्पोर्ट्स क्लब (ओखलढुंगा), आरएस क्लब पोखरा, नेपाल पुलिस क्लब, आयोजक बीस पचहत्तर युवा क्लब (रूपन्देही), कपिलवस्तु–११, संकटा क्लब र मकवानपुर फूटबल एकेडेमी हेटौंडा सहभागिता हुने छन् ।​

त्यसैगरी प्रतियोगितामा सर्वोकृष्ट खेलाडीले २५ हजार, उत्कृष्ट फरवार्डले १० हजार, उत्कृष्ट गोलरक्षकले १० हजार, उत्कृष्ट डिफेन्सले १० हजार, उत्कृष्ट कोचले १० हजार पुरस्कारको व्यवस्था गरिएको अध्यक्ष थापाले बताए ।

गत वर्ष ट्रिनिटी क्लब वालिङले उपाधि चुमेको थियो । प्रतियोगिता सम्पन्न गर्न झण्डै २८ लाख रुपैयाँ लाग्ने आयोजकले अनुमान गरेको छ ।

बुटवल–७ का वडा अध्यक्ष पदमराज गाहाले उपमहानगरपालिकाले खेलकुदको विकास र खेलाडी उत्पादनमा निरन्तर लागेको बताए । 

प्रतियोगिताले फूटबलको प्रबर्द्धनसँगै खेलकुदको विकासमा टेवा पुर्‍याउने अध्यक्ष गाहाले विश्वास व्यक्त गरे ।