इरानले स्ट्रेट अफ हर्मुजमा विदेशी जहाज आवागमनका लागि नयाँ विधेयकको मस्यौदा तयार पारेको छ ।

मस्यौदामा तेहरानले इजरायल र संयुक्त राज्य अमेरिकाका जहाजहरूको प्रवेशमा प्रतिबन्ध लगाउने तथा अन्य विदेशी जहाजहरूमा कर लगाउने प्रस्ताव गरेको छ ।

तेहरानले यसलाई आफ्नो सार्वभौमिकता र समुद्री सुरक्षालाई बलियो बनाउने कदमका रूपमा वर्णन गरेको छ ।

इरानी संसदको राष्ट्रिय सुरक्षा तथा विदेश नीति समितिका अध्यक्ष इब्राहिम अजिजीले तेहरानमा आयोजित एक समारोहमा विधायिका पुनः सुरु भएपछि यसलाई ‘निवारक कानून’ का रूपमा पारित गरिने बताएका छन् ।

उनले भने, “विधेयक तयार छ र विदेश मन्त्रालय तथा बन्दरगाह र समुद्री सङ्गठनसहित देशका सम्बन्धित अधिकारीहरूसँग श्रृंखलाबद्ध रूपमा बैठक गरी छलफल गरिएको छ ।”

अजिजीले यसअघि बिहीबार भनेका थिए, “इरानले हर्मुजको जलमार्गमा सधैं सुरक्षित र स्वतन्त्र आवागमन सुनिश्चित गर्न प्रयास गरेको छ । अमेरिकी सेनाको उपस्थिति र इजरायली आक्रमण खाडी तथा स्ट्रेट अफ हर्मुजमा असुरक्षा र अस्थिरताको मुख्य जड भएको छ ।”

यो विधेयकको उद्देश्य इरानको सार्वभौमिकतालाई बलियो बनाउनु रहेको उनले बताएका छन् ।

उनले भने, “इरानी संसदको यो विधेयक ‘स्ट्रेट अफ हर्मुज’मा इरानको सार्वभौमिकतालाई बलियो बनाउने उद्देश्यका साथ ल्याइएको हो । इरान सधैं यस महत्त्वपूर्ण जलमार्गमा सुरक्षित र स्वतन्त्र आवागमनको पक्षमा रहेको छ ।”

अमेरिकी सेनाको उपस्थिति र इजरायलको गतिविधिलाई यस क्षेत्रमा अस्थिरताको मुख्य कारण भएको उनले बताए । उनले भने, “विदेश मन्त्रालय र बन्दरगाह सङ्गठनजस्ता सम्बन्धित निकायसँग व्यापक छलफल गरेर विधेयकलाई अन्तिम रूप दिइएको छ ।”

इरानको अर्धसरकारी समाचार संस्था फार्स न्युज एजेन्सीका अनुसार शुक्रबार स्ट्रेट अफ हर्मुजमा इरानी सेना र अमेरिकी पानीजहाजबीच छिटपुट झडप भएको थियो ।