२७ असार २०८३, शनिबार
त्रिभुवन अन्तर्राष्ट्रिय विमानस्थलमा १२ वर्षपछि टर्किस एयरमा आएको समस्याका कारण केहीबेर उडान अवतरण अवरुद्ध भएको छ । सोमवार बिहान ल्याण्डिङका क्रममा विमानस्थलको रनवेमा विमानको टायरमा आगलागी भएपछि विमानस्थल २ घण्टा बन्द भएको हो ।
सोमवार समयमै आकस्मिक उद्धार भएका कारण ठूलो क्षति हुन पाएन । तर रनवेमै टायरमा आगजनी भएपछि विमानस्थलको उडान अवतरण दुइघण्टा अवरुद्ध हुन पुगेको हो । विमानस्थल बन्द हुँदा अन्तर्राष्ट्रिय र आन्तरिक विमानका उडान अवतरण प्रभावित भए ।
यसअघि १२ वर्ष पहिला टर्किसको विमान रनवेमा चिप्लिएर दुर्घटना भएपछि विमानस्थल नै बन्द भएको थियो । २०७१ फागुन २० गते टर्कीबाट काठमाडौं आएको विमान रनवेमा चिप्लिएर घाँसे मैदानमा पुगेको थियो । २२३ यात्रुसहित आएको विमान रनवेबाट बाहिर धसिँदा केही यात्रु घाइते भएका थिए ।
इण्डियन एयरफोर्सको विमानमार्फत् उपकरण ल्याएर धावनमार्गबाट विमान हटाएपछि मात्र ४ दिनपछि विमानस्थल सञ्चालनमा आएको थियो ।
सो दुर्घटनापछि नै काठमाडौं बाहिर पनि अन्तराष्ट्रिय विमानस्थल बनाउने बहस तीव्र भएको थियो ।
