बाजुराको हिमाली गाउँपालिका–१ मैतार्नास्थित कुवाडी खोलामा बगेर बेपत्ता भएका एक किशोर मृत अवस्थामा फेला परेका छन् ।

प्रहरीका अनुसार आइतबार दिउँसो करिब ३ बजे स्थानीय १३/१४ वर्षीय नवराज थापा साथीहरूसँग खोलामा नुहाउन गएका बेला खोलाले बगाएर बेपत्ता भएका थिए । उनीसँगै विराज थापा, विशाल थापा र किस्मत थापासमेत खोलामा नुहाउन गएका थिए ।

घटनाबारे जानकारी प्राप्त हुनासाथ प्रहरी चौकी बिच्छियाबाट प्रहरी हवल्दारको कमान्डमा टोली खटिएको थियो । 

सोमबार बिहान अस्थायी प्रहरी पोस्ट कुवाडीबाट समेत थप टोली परिचालन गरिएको थियो । खोजतलासका क्रममा सोमबार दिउँसो १ बजेतिर नवराजको शव बगेको स्थानबाट करिब ३०० देखि ४०० मिटर तल फेला परेको प्रहरीले जनाएको छ ।

घटनास्थलतर्फ जिल्ला प्रहरी कार्यालय बाजुराबाट प्रहरी निरीक्षकको कमान्डमा थप टोली खटिएको छ । प्रहरीले घटनाबारे थप अनुसन्धान भइरहेको जनाएको छ ।