०१ साउन २०८३, शुक्रबार
आईसीसी क्रिकेट विश्वकप लिग–२ प्रतियोगिताको आगामी शृंखलाको तयारीका क्रममा सोमबार खेलिएको अभ्यास खेलमा नेपाल ‘ए’ टोलीले अमेरिकालाई सात रनले हराएको छ ।
मूलपानी क्रिकेट मैदानमा पहिले ब्याटिङ गरेको नेपालले ४९.५ ओभरमा अलआउट हुनुअघि दुई सय ६४ रन बनाएको थियो ।
जवाफी ब्याटिङमा ओर्लिएको अमेरिकाले भने ४९.१ ओभरमा अलआउट हुनुअघि दुई सय ५७ रनमात्र बनाउन सक्यो ।
नेपालका लागि सन्दीप जोराले उत्कृष्ट अर्धशतकीय पाली खेले । चौथो नम्बरमा क्रिज समाल्न आएका उनले एक सय ११ रन बनाए ।
यसक्रममा उनले एक सय १५ बलको सामना गरी चार छक्का र नौवटा चौका पनि हिर्काए । बसिर अहमदले ३८ र मायान यादवले २४ रन जोडे । अमेरिकाका सौरव नेत्रवाल्करले तीन विकेट लिए ।
अमेरिकालाई लक्ष्यसम्म पुग्न नदिन नेपाली टोलीका बलर शेर मल्लले चार विकेट लिए । उनले ७.१ ओभरमा एक मेडन राख्दै ३० रन खर्चिए ।
बसिर अहमदले पनि तीन विकेट हात पारे । उनले आठ ओभरमा ४४ रन खर्चिए । पवन सर्राफ र साहब आलमले पनि एक/एक विकेट लिए ।
अमेरिकाका लागि सेहन जयसूर्याले सर्वाधिक ७७ रन बनाए । शुभम रन्जनेले पनि टोलीको खातामा ४७ रन थपे । नेपाल ‘ए’ टोलीले अभ्यास खेलमा यसअघि पनि अमेरिका र स्कटल्यान्डलाई हराएको थियो ।
लिग–२ शृंखला मंगलबारदेखि कीर्तिपुरस्थित अन्तर्राष्ट्रिय क्रिकेट मैदानमा सुरु हुँदैछ । उक्त शृंखलामा नेपाल, अमेरिका र स्कटल्यान्ड सहभागी छन् ।
