२८ असार २०८३, आइतबार
नेपाली कांग्रेसका निवर्तमान कार्यवाहक सभापति पूर्णबहादुर खड्काले पार्टीको हालै गरिएको केन्द्रीय कार्यसमिति विस्तारप्रति असन्तुष्टि जनाएका छन् । उनले यो निर्णयले कांग्रेसको बृहत् र सम्पूर्ण एकताको उद्देश्यमा ठेस पुगेको टिप्पणी समेत गरेका छन् ।
खड्काले मंगलबार सामाजिक सञ्जाल फेसबुकमार्फत टिप्पणी सार्वजनिक गर्दै वैशाख २८ गते सोमबार गरिएको केन्द्रीय कार्यसमितिको मनोनयनबारे आफूलाई कुनै जानकारी वा परामर्श नभएको उल्लेख गरेका छन् ।
उनले पार्टीभित्र एकता कमजोर हुने गरी निर्णय भएको संकेत गर्दै नेतृत्वलाई पुनः एकताका लागि अघि बढ्न आग्रह गरेका छन् ।
उनले केही साताअघि सभापति गगन थापा र त्यसपछि थापा तथा उपसभापति विश्वप्रकाश शर्मासँग भएको छलफलमा देशको राष्ट्रियता, लोकतान्त्रिक मूल्य–मान्यतामाथि बढ्दो चुनौती र कांग्रेसको कमजोर बन्दै गएको भूमिकाबारे आफ्नो धारणा राखेको उल्लेख गरेका छन् ।
‘समय कम छ, अरु सबै कुरा छोडेर पार्टीलाई सम्पूर्ण रूपमा एक बनाउने अभियानमा आजैदेखि लाग्नुहोस् भनेर (थापा र शर्मालाई)अनुरोध गरेको थिएँ’, खड्काले लेखेका छन्।
वर्तमान परिस्थिति कांग्रेसका लागि स्थापनाकालदेखि अहिलेसम्मकै अप्ठ्यारो घडी भएको उनको टिप्पणी छ । खड्काले पार्टीको बृहत् र सम्पूर्ण एकताविना कांग्रेसले राष्ट्रिय राजनीतिमा प्रभावकारी भूमिका खेल्न नसक्ने बताएका छन् ।
उनले पार्टीलाई एकताबद्ध बनाउने मुख्य जिम्मेवारी सभापति गगन थापा र उपसभापति विश्वप्रकाश शर्माको काँधमा रहेको उल्लेख गर्दै अन्य नेताहरूको भूमिका सहयोगी मात्र हुने बताएका छन् ।
खड्काले विगतमा विभाजित कांग्रेसले ठूलो राजनीतिक क्षति बेहोर्नुपरेको स्मरण गर्दै त्यसबाट पाठ सिक्नुपर्ने बताएका छन् । उनले फागुन २१ गते सम्पन्न आम निर्वाचनको परिणामले कांग्रेसलाई झस्काउने मात्र नभई ठूलो क्षति पुर्याएको उल्लेख गर्दै अब नयाँ सोच, साझा दृष्टिकोण र भावनात्मक एकताको आवश्यकता रहेको बताएका छन् ।
