गुल्मीमा श्रीमान्‌को कुटपिटबाट श्रीमतीको मृत्यु भएको छ ।​ 

इस्मा गाउँपालिका वडा नम्बर ६ साहुघर निवासी ४५ वर्षीय थम्मनबहादुर कुमालले कुटपिट गर्दा उनकी श्रीमती सुमित्रा कुमालको मृत्यु भएको जिल्ला प्रहरी कार्यालय गुल्मीले जनाएको छ ।

जिल्ला प्रहरी कार्यालय गुल्मीका सूचना अधिकारी गङ्गा सारूका अनुसार मङ्गलबार साँझ कुटपिटपछि राति नै सुमित्रालाई उपचारका लागि गुल्मी अस्पताल ल्याइएको थियो । तर अस्पतालले राति १२ बजे मृत घोषणा गरेको थियो ।​

मृतक सुमित्राको मुखमा र घाँटीमा चोट लागेको थियो भने छातीका सात वटा करङ भाँचिएको अस्पतालको प्रतिवेदनमा उल्लेख छ ।

मादक पदार्थ सेवनबाट उक्त घटना घटाएको प्रहरीले जनाएको छ । अहिले थम्मनलाई प्रहरीले नियन्त्रणमा लिई अनुसन्धान शुरू गरेको छ ।