इरानी सरकारी टेलिभिजनले युरोपेली देशहरूले होर्मुज स्ट्रिट (जलसन्धि) बाट आफ्ना जहाजहरू लैजानका लागि इरानसँग वार्ता गरिरहेको दाबी गरेको छ।

 बीबीसी फारसी सेवाका अनुसार इरानी न्युज नेटवर्क र ब्रोडकास्टिङ कर्पोरेसनले युरोपेली देशहरूको नाम नलिई यो खबर सार्वजनिक गरेका हुन्।

इरानी सञ्चारमाध्यमले भनेका छन्, 'चीन, जापान र पाकिस्तान लगायतका पूर्वी एसियाली देशहरूका जहाजहरू उक्त मार्गबाट गुज्रिएपछि अहिले युरोपेली देशहरूले पनि आफ्ना जहाजका लागि अनुमति पाउन रिभोलुसनरी गार्डको नौसेनासँग संवाद सुरु गरेका छन्।'

गत फेब्रुअरी २८ मा अमेरिका र इजरायलसँग युद्ध सुरु भएयता इरानले यो रणनीतिक रूपमा महत्त्वपूर्ण समुद्री मार्गलाई लगभग बन्द गरिदिएको छ। 

होर्मुज जलसन्धिमा इरानको नियन्त्रणका कारण विश्वभरको तेल र ग्यास बजारमा गम्भीर असर परेको छ। सामान्य अवस्थामा विश्वको कुल तेल र एलएनजी निर्यातको करिब २० प्रतिशत यही मार्गबाट हुने गर्दछ।

तेल र ग्यासका अतिरिक्त अन्य धेरै आवश्यक वस्तुहरूको ढुवानीका लागि पनि यो जलसन्धि विश्वकै प्रमुख मार्ग मानिन्छ।