३० जेठ २०८३, शनिबार
नेपाल कम्युनिस्ट पार्टी (एमाले)को सचिवालय बैठक आज आइतबार पनि बस्ने भएको छ ।
उपमहासचिव लेखराज भट्टका अनुसार बैठक बिहान ११:३० बजे अध्यक्ष केपी शर्मा ओलीको निवास गुन्डु भक्तपुरमा शुरू हुनेछ । बैठकमा अब बोल्न बाँकी चार सचिवले आफ्नो धारणा राख्नेछन् ।
सबैको धारणा आएपछि प्रस्तावित एजेन्डामाथि निर्णय प्रक्रियालाई अगाडि बढाइने भट्टले बताए । आइतबारको बैठकमा अध्यक्ष ओलीले समेत निर्देशनात्मक सम्बोधन गर्नेछन् ।
एमाले सचिवालय बैठक शुक्रबारदेखि जारी छ । शनिबार दोस्रो दिनको बैठकमा पार्टीका महासचिव, तीन उपमहासचिव र पाँच सचिवसहित नौ जना नेताहरूले आफ्नो धारणा राखेका थिए ।
बैठकमा बोल्ने अधिकांश नेताहरूले अध्यक्ष ओलीमाथि नेतृत्व छाड्न दबाब बढाएका छन् । शनिबारसम्म बोल्ने नेताहरूमध्ये अधिकांशले ओलीले मार्ग प्रशस्त गर्नुपर्ने बताएका छन् ।
पार्टीभित्र पार्टी पुनर्गठनको आवाज बलियोसँग उठेको भन्दै नेताहरूले अब अहिलेकै नेतृत्वबाट पार्टी र आन्दोलन अघि बढ्न नसक्ने बताएका छन् ।
शनिबारको बैठकमा धारणा राखेका महासचिव शंकर पोखरेल पनि उपाध्यक्षहरूकै लाइनमा उभिए । महासचिव पोखरेलले अहिलेकै अवस्थामा पार्टीको आन्दोलन र पार्टी अघि बढ्न नसक्ने बताए ।
उनले राजीनामा भन्ने शब्द प्रयोग नगरे पनि अहिलेकै नेतृत्वमा आन्दोलन अघि बढ्न नसक्ने कुरा प्रस्टसँग राखेको बैठकमा सहभागी एक नेताले बताए ।
‘महासचिवले पनि हिजो उपाध्यक्षहरूले बोलेकै लाइनमा बोल्नुभयो । उहाँले राजीनामा भन्ने शब्द त प्रयोग गर्नुभएन तर अब अहिलेकै नेतृत्वबाट पार्टी र आन्दोलन अघि बढ्न नसक्ने कुरा राख्नुभयो’, एमालेका ती पदाधिकारीले लोकान्तरसँग भने ।
बैठकमा महासचिव पोखरेलले पार्टीभित्र गम्भीर समस्या रहेको बताए । उनले कार्यकर्तामा निराशा बढिरहेको र त्यो निराशा यत्तिकै आशामा नबदलिने बताएका थिए ।
‘अब पार्टी पुनर्गठन गरेर जानुपर्छ । अहिलेकै अवस्थाले हुँदैन । पार्टीभित्र गम्भीर समस्या छ । पुनर्गठनको आवाज बलियो बनिरहेको छ । कार्यकर्तामा रहेको निराशा यत्तिकै आशामा बदलिँदैन’, महासचिव पोखरेलको भनाइ उदृत गर्दै एक पदाधिकारीले लोकान्तरसँग भने ।
शुक्रबार पनि उपाध्यक्षहरू विष्णु पौडेल, पृथ्वीसुब्बा गुरुङ, रघुजी पन्त, गोकर्ण विष्टलगायतले ओलीले मार्ग प्रशस्त गर्नुपर्ने बताएका थिए ।
अहिलेसम्म बोलेका पदाधिकारीमध्ये उपाध्यक्ष रामबहादुर थापा ‘बादल’ र सचिव महेश बस्नेत मात्र ओलीको बचाउमा उत्रिएका छन् । उनीहरूले संकटको बेला नेतृत्वको रक्षा गरेर जानुपर्ने धारणा राखेका छन् ।
शनिबारको बैठकमा सचिव बस्नेतले धारणा राख्दै ओलीको राजीनामा माग्ने नेताहरूलाई अपराधीको संज्ञा समेत दिएका थिए ।
