इन्डियन प्रिमियर लिग (आइपिएल) २०२६ को अन्तिम लिग खेलमा दिल्ली क्यापिटल्सले कोलकाता नाइट राइडर्सलाई ४० रनले पराजित गरेको छ । 

ईडन गार्डेन्समा आइतबार राति भएको खेलमा टस हारेर पहिले ब्याटिङ गरेको दिल्लीले निर्धारित २० ओभरमा ५ विकेट गुमाएर २०३ रनको बलियो योगफल तयार पारेको थियो । जवाफी ब्याटिङमा उत्रिएको कोलकाता १८.४ ओभरमा १६३ रनमै अलआउट हुन पुग्यो । यद्यपि, यी दुवै टोली यसअघि नै प्लेअफको दौडबाट बाहिरिसकेका थिए ।

दिल्लीको जितमा ओपनिङ ब्याट्सम्यान केएल राहुलले मुख्य भूमिका खेले । उनले मात्र ३० बलमा ५ चौका र ४ छक्का प्रहार गर्दै ६० रनको विष्फोटक पारी खेले । त्यस्तै कप्तान अक्षर पटेलले ३९ रन, डेभिड मिलरले २८ रन र आशुतोष शर्माले अविजित १८ रन जोड्दै टोलीलाई २०० रनको आँकडा पार गराएका थिए । कोलकाताका लागि सौरभ दुबे, वरुण चक्रवर्ती, सुनील नरेन र अनुकूल रोयले समान १-१ विकेट लिए ।

२०४ रनको विशाल लक्ष्य पछ्याएको कोलकाताका लागि कप्तान अजिंक्य रहाणेले ३९ बलमा ६३ रनको संघर्षपूर्ण अर्धशतकीय पारी खेले पनि टोलीलाई जित दिलाउन सकेनन् । रोभम्यान पावेलले २९ र मनिष पाण्डेले २५ रन जोडे पनि अन्य ब्याट्सम्यानले दोहोरो अंकमा रन बनाउन सकेनन् ।

कोलकाताको इनिङ्सलाई धरासायी बनाउन कुलदीप यादव र लुङ्गी एनगिडीले घातक बलिङ गर्दै समान ३-३ विकेट लिए । मिचेल स्टार्कले पनि २ विकेट लिए भने अक्षर पटेलले १ विकेट झारे ।

यो हारसँगै कोलकाताले यस सिजनको अन्त्य निराशाजनक हारबाट गरेको छ भने दिल्लीले जितका साथ प्रतियोगिताबाट बिदा लिएको छ । अब मे २६ बाट प्लेअफका खेलहरू सुरु हुनेछन्, जसमा बेङ्गलुरु, गुजरात, हैदराबाद र राजस्थानले उपाधिका लागि प्रतिस्पर्धा गर्नेछन् ।