०९ साउन २०८३, शनिबार
सभामुख डोलप्रसाद (डीपी) अर्यालले प्रधानमन्त्री वालेन्द्र शाह (बालेन) संसद्मा आएर सांसदका प्रश्नको जवाफ दिने तयारी गरेको बताएका छन् । संसद्मा विपक्षी दलले गरेको मागबारे बालेन जानकार रहेको उनले बताए ।
मंगलबारको प्रतिनिधिसभा बैठकमा विपक्षी दलले अवरोध गरेपछि सभामुख अर्यालले प्रधानमन्त्रीसँग आफ्नो नियमित संवाद भइरहेको र छिट्टै संसदमा आएर जवाफ दिने जानकारी गराएका हुन् ।
'हामी केही दिनदेखि एउटै विषयमा प्रवेश गरिरहेका छौं, प्रधानमन्त्री सदनमा आएर सांसदको प्रश्नको जवाफ दिनुपर्यो । जुन विषय अत्यन्त जायज छ, जनताको माग पनि त्यही हो । यस विषयमा हामीले विपक्षी दलसँग पटकपटक संवाद गरेका छौं,' सभामुख अर्यालले भने, 'सत्तापक्षसँग पनि संवाद भएको छ । सरकारसँग र स्वयं प्रधानमन्त्रीसँग मेरो संवाद भइरहेको छ । प्रधानमन्त्रीले संसदमा आउने तयारी गर्नुभएको छ । यो भन्दा अगाडि पनि भनेको थिए, सदनमा भइरहेको विषयमा उहाँ जानकार हुनुहुन्छ ।'
सभामुख अर्यालले प्रधानमन्त्री संसदमा आएर सांसदका जवाफ दिने भन्दै बैठक सुचारु गर्न विपक्षी दलसँग आग्रह गरे । 'हामी कार्यसूचीमा रहेको आजको कार्यक्रम अगाडि बढाऔं । केही दिनमा बजेट आउँदैछ, प्रधानमन्त्रीले प्रश्नको उत्तर दिने तयारी गर्नुभएको छ,' अर्यालले भने ।
यसअघि मंगलबारको बैठकमा सभामुखले संस्कृति मन्त्रीलाई प्रस्ताव पेश गर्न समय दिएलगत्तै विपक्षी दलले उठेर विरोध गरेपछि संसद अवरुद्ध भएको थियो ।
