रोयल च्यालेन्जर्स बैंगलोरले लगातार दोस्रो पटक इन्डियन प्रिमियर लिग (आईपीएल) क्रिकेटको फाइनलमा स्थान सुरक्षित गरेको छ। मंगलबार धर्मशालामा सम्पन्न क्वालिफायर १ को खेलमा गुजरात टाइटन्सलाई ९२ रनको विशाल अन्तरले पराजित गर्दै बैंगलोरले उपाधि नजिकको यात्रा तय गरेको हो ।

यो जितसँगै बैंगलोरका कप्तान रजत पाटीदारले एमएस धोनी र रोहित शर्माजस्ता दिग्गज कप्तानहरूको विशेष सूचीमा आफ्नो नाम लेखाएका छन् । उनी लगातार दुई पटक आईपीएल फाइनलमा टोलीको नेतृत्व गर्ने पाँचौँ कप्तान बनेका छन् । पाटीदारले ब्याटिङमा पनि आफ्नो चमक देखाउँदै अविजित ९३ रनको उत्कृष्ट इनिङ खेले, जसको मद्दतले बैंगलोरले आईपीएल प्लेअफ इतिहासकै सर्वाधिक २ सय ५४ रनको योगफल खडा गरेको थियो । खेलको दौरान पाटीदार २०० छक्का प्रहार गर्ने सबैभन्दा छिटो भारतीय ब्याट्सम्यान समेत बने।

टस हारेर पहिले ब्याटिङ गरेको बैंगलोरले निर्धारित २० ओभरमा ५ विकेट गुमाएर २५४ रन बनाएको थियो । जवाफमा २ सय ५५ रनको विशाल लक्ष्य पछ्याएको गुजरातको सुरुवात निकै खराब रह्यो । साइ सुदर्शन हिट-विकेट आउट भए भने कप्तान शुभमन गिल मात्र २ रनमा पेभेलियन फर्किए । 

टोलीका लागि राहुल तेवाटियाले ४३ बलमा ६८ रनको संघर्षपूर्ण इनिङ खेले पनि अन्य ब्याट्सम्यान चल्न सकेनन् । अन्ततः गुजरात १९.३ ओभरमा १ सय ६२ रनमा समेटियो । बैंगलोरका लागि डफीले तीन विकेट लिए भने कृणाल पाण्ड्या, भुवनेश्वर कुमार र रसिक सलामले दुई-दुई विकेट हात पारे।

यो जित आईपीएल प्लेअफको इतिहासमा रनको आधारमा दोस्रो ठूलो जित हो। यसअघि सन् २००८ मा राजस्थान रोयल्स दिल्लीविरुद्ध १ सय ५ रनले विजयी भएको थियो। बैंगलोर कुल पाँचौँ पटक आईपीएल फाइनलमा पुगेको छ। यसअघि टोली २००९, २०११, २०१६, २०२५ र २०२६ मा फाइनलमा पुगेको थियो। साथै, टी-२० क्रिकेटमा बैंगलोरले चौथो पटक २ सय ५० भन्दा बढी रन बनाएर भारत र सनराइजर्स हैदराबादपछि तेस्रो स्थानमा आफूलाई उभ्याएको छ ।