वासिङ्टन र तेहरानबीच पर्दापछाडि सञ्चालन भइरहेको सघन शान्ति वार्ताबीच अमेरिकी सेनाले इरानमाथि पुनः नयाँ हवाई आक्रमण गरेको छ । अमेरिकी सेनाले बुधबार एक नयाँ सैन्य कारबाही गरेको सीएनएन र रोयटर्सले जनाएका छन् । अमेरिकी रक्षा अधिकारीहरूका अनुसार यो कदम पूर्ण रूपमा सन्तुलित र आत्मरक्षात्मक मात्र नभई क्षेत्रमा जारी युद्धविरामलाई कायम राख्ने उद्देश्यले प्रेरित थियो ।

अमेरिकी सेनाले आकाशमा खतरा खडा गरिरहेका इरानका चारवटा आधुनिक आक्रमणकारी ड्रोनहरूलाई सफलतापूर्वक खसालिदिएको जनाएको छ । त्यसैगरी, रणनीतिक रूपमा निकै महत्वपूर्ण मानिएको इरानी बन्दरगाह सहर एवं नौसैनिक अड्डा बन्दर अब्बासमा रहेको एक इरानी ग्राउन्ड कन्ट्रोल स्टेसनमाथि पनि अमेरिकी सेनाले मिसाइल प्रहार गरेको समाचारमा उल्लेख छ । 

उक्त नियन्त्रण केन्द्रबाट पाँचौँ ड्रोन प्रक्षेपण गर्नै लागिएको अवस्थामा अमेरिकी बलले त्यसलाई रोक्न सफल भएको दाबी गरिएको छ। तनाब बढेसँगै अन्तर्राष्ट्रिय बजारमा कच्चा तेलको मूल्यमा तत्कालै ठूलो उछाल आएको छ। केही समययताकै सबैभन्दा न्यून विन्दुमा ओर्लिएको तेलको मूल्य यो आक्रमणको रिपोर्टपछि वृद्धि भई ब्रेन्ट क्रुड फ्युचर्स प्रति ब्यारेल ९३ डलर र वेस्ट टेक्सास इन्टरमिडिएट क्रुड फ्युचर्स १.६ प्रतिशतले बढेर ९०.१० डलरभन्दा माथि पुगेको छ।

इरानको इस्लामिक रिभोलुसनरी गार्ड कोर्प्ससँग बलियो आबद्धता रहेको अर्ध-सरकारी फार्स न्युज एजेन्सीका अनुसार स्थानीय समय अनुसार बिहीबार बिहानको करिब १:३० बजे बन्दर अब्बासको पूर्वी भू-भागमा तीनवटा शक्तिशाली विस्फोटका आवाजहरू सुनिएका थिए। यी ठूला विस्फोटका कारण बन्दर अब्बास क्षेत्रमा तैनाथ इरानी वायु रक्षा प्रणाली केही समयका लागि सक्रिय हुन पुगेको थियो। इरानी सञ्चारमाध्यमहरूले यी आवाजहरूको सही स्थान र वास्तविक स्रोत पहिल्याउन अझै अनुसन्धान र अनुगमन जारी रहेको उल्लेख गरेका छन्।

ह्वाइट हाउसमा आयोजित एक महत्वपूर्ण मन्त्रिपरिषद् बैठकमा अमेरिकी राष्ट्रपति डोनाल्ड ट्रम्पले सैन्य कारबाही र धम्कीको आफ्नो फेरिस्तमा नयाँ मुलुक थपेका छन् । ओभल अफिसमा फर्किएपछिको यो १२औँ बैठकमा आप्रवासन, मुद्रास्फीति र समग्र अर्थतन्त्रजस्ता आगामी मध्यवधि निर्वाचनका लागि संवेदनशील आन्तरिक एजेन्डाहरूमा छलफल हुने तय भए पनि समग्र वातावरणमा इरान संकट नै हाबी हुन पुग्यो। 

बैठकमा बोल्दै ट्रम्पले इरानसँग मिलेर हर्मुजमा आफ्नो नियन्त्रण कायम गर्न खोजेमा ओमानमाथि पनि सैन्य आक्रमण गर्ने खुला धम्की दिएका छन्। उनले ओमानले अरू देशहरू जस्तै शिष्ट व्यवहार गर्नुपर्ने, अन्यथा उसलाई समेत सैन्य बल प्रयोग गरेर उडाइदिने चेतावनी दिए।

आफ्नो कार्यकालमा मात्रै ट्रम्पले इरान, इराक, नाइजेरिया, सोमालिया, सिरिया, भेनेजुएला र यमनसहित सातवटा देशमा बमबारी गरिसकेका छन् । यसबाहेक उनले क्यानडा, कोलम्बिया, क्युबा, ग्रीनल्याण्ड, मेक्सिको, पानामा र अहिले ओमानसहित अन्य सात देशहरूमा पनि सैन्य आक्रमणको सम्भावना खुला राख्दै धम्की दिएका छन्। 

तथ्याङ्कका अनुसार ट्रम्पले विश्वका झन्डै २०० देशहरूमध्ये १५ वटा देशलाई आफ्नो निसाना वा धम्कीको सूचीमा राखेका छन्, जसले संसारको कुल जनसंख्याको ११ जनामा १ जना हिस्सा ओगट्छ। 

यसको अर्थ पृथ्वीका हरेक ११ जनामा १ जना मानिस आफ्नो देशमा ट्रम्पले जुनसुकै बेला सैन्य आक्रमण शुरू गर्न सक्छन् भन्ने त्रास र चिन्तामा बाँचिरहेका छन् । 

ट्रम्पको आक्रामक नीतिमा मध्य पूर्वका मात्रै पाँचवटा देशहरू परेका छन् भने उनले धम्की दिएका १५ मध्ये क्यानडा, क्युबा, ग्रीनल्याण्ड, पानामा र भेनेजुएलालाई त संयुक्त राज्य अमेरिकामा गाभ्न सकिने सम्भावित साम्राज्यवादी लक्ष्यका रूपमा समेत पहिचान गरेका छन्।

मन्त्रिपरिषद् बैठक बस्नुअघि इरानी सरकारी टेलिभिजनले अमेरिका र इरानबीच एउटा अस्थायी समझदारी पत्रको मस्यौदा तयार भइरहेको र त्यसअन्तर्गत अमेरिकी नौसैनिक नाकाबन्दी हट्ने दाबी गरेको थियो । इरानी सञ्चारमाध्यमका अनुसार त्यसको बदलामा इरानले हर्मुजबाट हुने व्यावसायिक मार्गलाई एक महिनाभित्र युद्धपूर्वको अवस्थामा फर्काउने र जहाजहरूको व्यवस्थापन तथा मार्ग निर्देशन इरान र ओमान मिलेर सम्हाल्ने उल्लेख थियो। 

रिपोर्टमा इरानले आफ्नो आणविक महत्वाकांक्षा त्याग्ने वा समृद्ध युरेनियमको भण्डार हस्तान्तरण गर्नेबारे कुनै पनि कुरा उल्लेख गरिएको थिएन। ह्वाइट हाउसले इरानी मिडियाको यो दाबीलाई पूर्ण रूपमा खण्डन गर्दै यसलाई कपोलकल्पित र मनगढन्ते संज्ञा दिएको छ। 

मन्त्रिपरिषद् बैठकमा पत्रकारहरूसँग कुरा गर्दै राष्ट्रपति ट्रम्पले आफू अमेरिकी हित अनुकूल र पूर्ण सन्तोषजनक नहुने कुनै पनि सम्झौता स्वीकार गरेर हतारिने पक्षमा नरहेको स्पष्ट पारे। उनले आफू मध्यवधि निर्वाचनको नतिजा वा दबाबको चिन्ता नगर्ने नेता भएकाले समय लम्ब्याएर आफूलाई गलाउने इरानको रणनीति सफल नहुने चेतावनी दिए। 

ट्रम्पले भने, 'इरान आर्थिक रूपमा निकै कमजोर अवस्थामा छ र उनीहरू सम्झौता गर्न निकै उत्सुक छन्, किनकि उनीहरूसँग अर्को कुनै विकल्प नै छैन। तर अहिलेसम्म उनीहरू हामीले चाहेको विन्दुमा पुग्न सकेका छैनन् र हामी यसबाट सन्तुष्ट छैनौँ। कि त उत्कृष्ट सम्झौता हुनेछ, नत्र हामी पुनः युद्धको मैदानमा उत्रिएर यो काम पूर्ण रूपमा समाप्त गर्नेछौँ।' अमेरिकी विदेश मन्त्री मार्को रुबियोले पनि वार्तामा केही चासो र प्रगति देखिएको भन्दै आगामी केही घण्टा वा दिनहरूमा थप कुरा स्पष्ट हुने बताए पनि दुई पक्षबीच कुन विशिष्ट बुँदामा मुख्य असहमति बाँकी छ भन्ने कुरा खुलाएका छैनन्।

यसै समयमा, मध्य पूर्वको अर्को मुख्य मोर्चा लेबनानमा भने इजरायली सेनाले बीभत्स सैन्य कारबाही जारी राखेको छ। इजरायलले दक्षिणी लेबनानको तटीय क्षेत्रमा अवस्थित ऐतिहासिक टायर सहरका नागरिकहरूलाई सुरक्षित स्थानमा जान खाली गर्ने कडा चेतावनी जारी गरेको छ। लेबनानी जनस्वास्थ्य मन्त्रालयका अनुसार पछिल्लो २४ घण्टामा भएका इजरायली हवाई आक्रमणमा कम्तीमा चार बालबालिकासहित ३१ जनाको मृत्यु भएको छ, जसमध्ये टायर सहरको एउटै भीषण आक्रमणमा मात्रै १४ जनाले ज्यान गुमाएका छन्। यो घटनालाई क्षेत्रमा युद्धविराम प्रयास शुरू भएयताकै सबैभन्दा घातक र बीभत्स दिन मानिएको छ।