क्रिस्टियानो अब सकिए, उनी बुढा भए' विगत २३ वर्षदेखि फुटबलको सर्वोच्च शिखरमा रहँदा पनि जब-जब खेल बिग्रिन्छ, ४१ वर्षीय क्रिस्टियानो रोनाल्डोले सुन्नुपर्ने साझा आलोचना यही हो । फिफा विश्वकप २०२६ को पहिलो खेलमा प्रजातान्त्रिक गणतन्त्र कङ्गो (डीआर कङ्गो)सँग पोर्चुगल १–१ को बराबरीमा रोकिँदा रोनाल्डो फेरि एकपटक कडा आलोचनाको केन्द्रमा थिए। पूरै खेल अवधिभर मैदानमा जम्मा २५ पटक मात्र बल छोएका रोनाल्डोको क्षमतामाथि प्रश्न उठाउँदै उनलाई 'रिटायर्ड' खेलाडीको संज्ञा समेत दिन थालिएको थियो।

तर, दबाब र आलोचनालाई नै आफ्नो ऊर्जा बनाउन माहिर पाँच पटकका बालोन डी'ओर विजेता रोनाल्डोले गएराति ह्युस्टनमा आलोचकहरूलाई मैदानबाटै कडा जवाफ दिएका छन्। विश्वकपमा डेब्यु गरिरहेको उज्वेकिस्तानविरुद्ध ५–० को विशाल जित दर्ता गर्ने क्रममा कप्तान रोनाल्डोले उत्कृष्ट दुई गोल गर्दै फुटबल इतिहासमै आफ्नो नाम फेरि एकपटक स्वर्णिम अक्षरले लेख्न सफल भए।

उज्वेकिस्तान विरुद्धको खेल शुरू भएको ६ मिनेटमै रोनाल्डोले विश्वकप इतिहासमा कसैले नगरेको कीर्तिमान कायम गरे । जोआओ कान्सेलोको उत्कृष्ट क्रसलाई पेनाल्टी बक्सको नजिकैबाट लो हाफ-भलीमार्फत गोलमा परिणत गर्दै उनी ६ वटा फरक-फरक विश्वकप (२००६, २०१०, २०१४, २०१८, २०२२ र २०२६) मा गोल गर्ने विश्वकै पहिलो फुटबलर बने।

४१ वर्षको उमेरमा गरेको यो गोलसँगै उनी विश्वकप इतिहासमा गोल गर्ने दोस्रो सबैभन्दा बढी उमेरका खेलाडी समेत बनेका छन्। यसअघि सन् १९९४ को विश्वकपमा क्यामरुनका रोजर मिलाले ४२ वर्षको उमेरमा रुसविरुद्ध गोल गर्दै सबैभन्दा बढी उमेरमा गोल गर्ने कीर्तिमान बनाएका थिए।

रोनाल्डोको शुरूआती गोलपछि पोर्चुगलले खेलमा आफ्नो पूर्ण नियन्त्रण जमायो। खेलको १७औँ मिनेटमा नुनो मेन्डेसले २० यार्ड टाढाबाट प्रहार गरेको लो फ्री-किक सिधै जाली चुम्न पुग्यो, जसमा उज्वेकिस्तानका डिफेन्डर र गोलकिपर रोनाल्डोले प्रहार गर्ने भ्रममा पर्दा पूर्ण रूपमा झुक्किएका थिए।

खेलको ३९औँ मिनेटमा म्यानचेस्टर युनाइटेडका कप्तान ब्रुनो फर्नान्डेसले मैदानको मध्यभागबाट दिएको उत्कृष्ट थ्रु-पासलाई नियन्त्रणमा लिँदै रोनाल्डोले डिफेन्सको कडा घेराबन्दीबीच निकै कठिन कोणबाट व्यक्तिगत दोस्रो र टोलीका लागि तेस्रो गोल थपे। 

यो गोलसँगै रोनाल्डोले पोर्चुगलका महान् खेलाडी युसेबियोको कीर्तिमानलाई पछि पार्दै विश्वकपमा पोर्चुगलका लागि सर्वाधिक गोल गर्ने (१० गोल) खेलाडीको कीर्तिमान आफ्नो नाममा गरे।

दोस्रो हाफमा उज्वेकिस्तानका गोलकिपर अब्दुभोहिद नेमातोभको आत्मघाती गोल र खेल सकिनुभन्दा ३ मिनेट अगाडि सब्सिच्युट खेलाडी राफेल लियोको सशक्त प्रहार गोलमा परिणत भएपछि पोर्चुगलले ५–० को सानदार जित सुनिश्चित गर्‍यो। 

रोनाल्डोले विश्वकपमा आफ्नो पहिलो ह्याट्रिक गर्ने सुन्दर अवसर पाए पनि म्यानचेस्टर सिटीका डिफेन्डर अब्दुकदिर खुसानोभले गोललाइनबाट बल क्लियर गरिदिएका थिए।

खेल सकिएलगत्तै रोनाल्डोको अनुहारमा एउटा ठुलो राहत र खुसी स्पष्ट देखिन्थ्यो। उनले क्यामराको नजिकै आएर चिच्याउँदै भने, 'म फर्किएँ, म फर्किएँ (I'm back, I'm back)।' उनले विश्वकप र युरोकपजस्ता प्रमुख प्रतियोगिताहरूमा रहेको आफ्नो ११ खेलको गोल खडेरीलाई पनि यसैमार्फत पूर्णविराम लगाए।

खेलपछि भावुक बन्दै रोनाल्डोले विगतको साता आफ्ना लागि निकै कठिन र अँध्यारो रहेको स्वीकार गरे। 'भगवानले उनैलाई मद्दत गर्नुहुन्छ, जसले कडा मिहिनेत गर्छन्,' रोनाल्डोले भने, 'यो साता निकै कठिन र निराशाजनक थियो। मलाई फुटबलबाट सन्न्यास लिइसकेकोजस्तो महसुस गराइँदै थियो। तर मैले हार मानिनँ, किनकि म फुटबलको भाग्यभन्दा बढी आफ्नो कडा मिहिनेतमा विश्वास गर्छु।'

अर्जेन्टिनाका लियोनेल मेसीले अघिल्लो दिन अस्ट्रियाविरुद्ध दुई गोल गर्दै विश्वकप इतिहासकै सर्वाधिक गोलकर्ता (१८ गोल) को कीर्तिमान बनाएको सन्दर्भमा सोधिएको प्रश्नमा रोनाल्डोले स्पष्ट र सिधा जवाफ दिँदै भने, 'मलाई मेसीको गोलसँग कुनै सरोकार छैन, मेरो लक्ष्य केवल आफ्नो देशलाई जिताउनु हो।'

पोर्चुगलका मुख्य प्रशिक्षक रोबर्टो मार्टिनेजले रोनाल्डोलाई एक 'उत्कृष्ट कप्तान र रोल मोडल' भन्दै उनको बचाउ गरे। मार्टिनेजले भने, 'मेसी र रोनाल्डो दुवैले फुटबलको इतिहास बनाएका छन् र उनीहरूको प्रतिस्पर्धाले नै उनीहरूलाई महान् बनाएको हो। हाम्रो कप्तान एक आइकन हुन्।'

जितसँगै ४ अंक जोडेर पोर्चुगल समूह 'के' को शीर्ष स्थानमा उक्लिएको छ र नकआउट चरणको यात्रा लगभग सुरक्षित गरेको छ। अर्कोतर्फ, लगातार दुई खेल हारेको उज्वेकिस्तान अंकविहीन बन्दै संकटमा परेको छ।