गुल्मीमा एक पुरुषले केही वर्षको अन्तरालमा दुई श्रीमतीको हत्या गरेको खुलेको छ । 

पहिलो श्रीमतीको हत्या अभियोगमा जेल परेर कैद मिनाहापछि छुटेका उनले कान्छी श्रीमतीको पनि हत्या गरेपछि उनका चार सन्तान बिचल्लीमा परेका छन् ।

गुल्मीको इस्मा गाउँपालिका–५ का ४१ वर्षीय यामबहादुर कुमालले दुई श्रीमतीको हत्या गरेको खुलेको हो ।

पहिलो श्रीमतीको हत्या गरेर जेल गएका उनी संविधान दिवसको अवसरमा कैद मिनाहा पाएर छुटेका थिए । तर, छुटेको केही समयमै उनले दोस्रो श्रीमतीको पनि हत्या गरेका प्रहरीले जनाएको छ ।

जिल्ला प्रहरी कार्यालय गुल्मीका अनुसार यामबहादुरले मादक पदार्थ सेवन गरेर ३७ वर्षीया श्रीमती मुना कुमालमाथि कुटपिट गरेका थिए ।

गम्भीर घाइते भएकी मुनालाई प्रहरी टोलीले उद्धार गरेर जिल्ला अस्पताल तम्घास पुर्‍याए पनि उपचारकै क्रममा बुधबार चिकित्सकले मृत घोषणा गरेका हुन् ।

प्रहरीले घटनामा संलग्न यामबहादुरलाई नियन्त्रणमा लिएको छ ।

घटनाबारे थप अनुसन्धानका लागि प्रहरी निरीक्षक विवेक घलेको नेतृत्वमा टोली खटाइएको जिल्ला प्रहरी कार्यालय गुल्मीले जनाएको छ ।

प्रहरीका अनुसार यामबहादुर पहिलो श्रीमती हत्या प्रकरणमा जेल बसेका व्यक्ति हुन् । कैद मिनाहा पाएर छुटेका उनले फेरि कान्छी श्रीमतीको हत्या गरेका प्रारम्भिक अनुसन्धानबाट खुलेको छ ।​ 

यामबहादुरकी पहिलो श्रीमतीतर्फ दुई छोरी र एक छोरा तथा दोस्रो श्रीमतीतर्फ एक छोरा छन् ।