ललितपुरको इमाडोलमा बाटोमा हिँडिरहेकी युवतीलाई गोप्य अङ्ग प्रदर्शन तथा अश्लील हर्कत गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा बैतडी घर भई इमाडोल बस्दै आएका ५५ वर्षीय सुरेन्द्र भट्ट छन् । 

उनलाई सोमबार दिउँसो पक्राउ गरिएको जिल्ला प्रहरी परिसर, ललितपुरका प्रवक्ता गौतम मिश्रले लोकान्तरलाई जानकारी दिए ।

प्रहरीका अनुसार भट्ट सिंहदरबारस्थित रक्षा मन्त्रालयमा शिक्षा अधिकृतको रूपमा कार्यरत रहेको खुलेको छ। 

बाटोमा एक्लै हिँडिरहेको समयमा अश्लील हर्कत गरेको भन्दै एक युवतीले टिकटकमार्फत एउटा सार्वजनिक गरेकी थिइन् ।

युवतीले आइतबार साँझ टिकटकमा भिडियो अपलोड गरेपछि प्रहरीले उनको खोजी गरेको थियो ।

पक्राउ परेका भट्टलाई प्रहरी वृत्तको सातदोबाटोको हिरासतमा राखिएको र थप अनुसन्धान भइरहेको प्रहरीले जनाएको छ ।