जारी फिफा विश्वकप २०२६ मा लियोनेल मेसी, इर्लिंग हालान्ड र किलियन एम्बाप्पेले लगातार गोल गरिरहँदा इजिप्टका स्टार खेलाडी मोहम्मद सलाह भने आफ्नो नाममा मात्र एक गोल सजाउँदै प्रतियोगिताबाट बाहिरिएका छन्।

सलाहले जुन २२ मा न्युजिल्यान्डविरुद्धको जितमा एकमात्र गोल गरेका थिए। अर्जेन्टिनाविरुद्धको महत्त्वपूर्ण खेलमा भने इजिप्टका कप्तान सलाहले गोलका लागि कुनै पनि प्रहार गर्न सकेनन् र कुनै 'कि पास' (गोलको अवसर सिर्जना गर्ने पास) समेत निकाल्न असफल रहे ।

सन् २०३० को विश्वकप मोरक्को, पोर्चुगल र स्पेनमा संयुक्त रूपमा आयोजना हुँदा सलाह ३८ वर्षका पुग्नेछन् । पोर्चुगलका ४१ वर्षीय क्रिस्टियानो रोनाल्डो र क्रोएसियाका ४० वर्षीय लुका मोड्रिचले यस विश्वकपमा आफ्नो खेल जीवनकै अन्तिम विश्वकप खेलिसकेका छन् । 

यस्तो अवस्थामा अबको चार वर्षपछि सलाह इजिप्टको टोलीसँगै पुनः विश्वकपको मञ्चमा फर्किनेछन् वा छैनन् भन्ने कुरा हेर्न बाँकी नै छ।

इजिप्टको बहिर्गमनसँगै विश्वकपमा सहभागी अफ्रिकाका १० टोलीहरूमध्ये अब मोरक्को मात्रै मैदानमा बाँकी रहेको छ। मोरक्कोले चार वर्षअघि (२०२२ को विश्वकपमा) विश्वकपको सेमिफाइनल पुग्ने पहिलो अफ्रिकी राष्ट्र बनेर इतिहास रचेको थियो।

'एटलस लायन्स' को नामले चिनिने मोरक्कोले अब सेमिफाइनल प्रवेशका लागि आगामी बिहीबार ब्याट्सन स्टेडियममा बलियो टोली फ्रान्सको सामना गर्नेछ।