३१ असार २०८३, बुधबार
त्रिभुवन अन्तर्राष्ट्रिय विमानस्थलमा पत्रकार सम्मेलन गर्न लागेका मेडिकल व्यवसायी दुर्गा प्रसाईंलाई प्रहरीले नियन्त्रणमा लिएर उनको भक्तपुरस्थित निवासमा पुर्याएर छाडेको छ ।
झापाबाट आएपछि प्रसाईंले विमानस्थलमै पत्रकार सम्मेलनको तयारी गरेका थिए । त्यो सूचना प्रहरीले पाएसँगै उनलाई ‘निषेधित क्षेत्रमा कार्यक्रम गर्न नपाइने’ भन्दै नियन्त्रणमा लिएर घर लगेको हो ।
जिल्ला प्रहरी परिसर काठमाडौंका प्रवक्ता एवं प्रहरी उपरीक्षक पवनकुमार भट्टराईका अनुसार निषेधित क्षेत्रमा कार्यक्रम गर्न लागेपछि प्रसाईंलाई नियन्त्रणमा लिएर भक्तपुरस्थित निवास पुर्याइएको हो ।
भट्टराईले लोकान्तरसँग भने, ‘निषेधित क्षेत्रमा कार्यक्रम गर्न पाइँदैन, उहाँलाई आदर साथ प्रहरीले नियन्त्रणमा लिएर भक्तपुरस्थित निवास लगिदिएका हो ।’
प्रसाईंले आत्मदाह गरेका गणेश नेपालीको विषयमा केही बताउने भन्दै पत्रकार सम्मेलन गर्न लागेका थिए ।
तस्वीरहरू : नेपाल फोटो लाइब्रेरी
