विराटनगर, १४ वैशाख– गत माघ पहिलो हप्ता त्रिभुवन अन्तर्राष्ट्रिय विमानस्थलबाट भित्रिएर हराएको भनिएको तस्करीको ३३ किलो सुन काण्डका अभियुक्तसँग नेपाल प्रहरीका १ नम्बर प्रदेशका प्रहरी नायव महानिरीक्षक (डिआईजी)ले गोप्य भेट गरेका छन् ।  

प्रदेश प्रहरीको निमित्त प्रमुखको समेत जिम्मेवारी सम्हालिरहेका डिआईजी ज्ञान बिक्रम शाहले ३३ किलो सुन काण्डका अभियुक्तका रुपमा प्रहरी हिरासतमा रहेका प्रहरीका पूर्व र वहालवाला अधिकारीसँग गोप्य रुपमा भेटवार्ता गरेका हुन् । 

मध्याह्न १२ बजेसम्म विराटनगरको रानीस्थित प्रदेश प्रहरीको कार्यालयमै रहेका डिआईजी दिउँसो १ः४० बजे तीनपैनीमा रहेको जिल्ला प्रहरी कार्यालय मोरङमा पुगेका थिए । प्रदेश र जिल्ला प्रहरी कार्यालयबीचको दुरी कबिर ६ किलोमिरटको छ । डिआईजी शाह करिब ३० मिनेटसम्म जिल्ला प्रहरी कार्यालयमा बसेका थिए । 

जिल्ला प्रहरी कार्यालयमा रहँदा डिआईजी शाहले ३३ किलो सुन प्रकरण र त्योसँगै जोडिएको सनम शाक्य हत्याकाण्डको अभियुक्तका रुपमा हिरासतमा रहेका पूर्व डिआईजी, बहालवाला एसपी, डिएसपीसँग गोप्य भेटवार्ता गरेका थिए । 

डिआईजी शाहले हिरासतमा रहेका पूर्व डिआईजी गोबिन्द निरौला, प्रहरी उपरीक्षक (एसपी) विकासराज खनाल तथा प्रहरी नायव उपरीक्षक (डिएसपी) सञ्जय राउतसँग गोप्य भेट भएका हुन् । 

डिआईजी शाहले ३ जनासँग जिल्ला प्रहरी कार्यालयका प्रमुख एसपी अरुण कुमार बिसीको कार्यकक्षमा भेटवार्ता गरेका थिए । डिआईजी शाह जिप्रका पुग्दा एसपी बिसी भने कार्यालयमा नरहेको जनाइएको छ ।  डिआईजी साह सादा पोसाकमा जिप्रका पुगेका थिए ।

सुनकाण्डका अभियुक्त प्रहरी अधिकारीसँगको गोप्य भेटवार्ता पछि डिआईजी शाह विराटनगरबाट काठमाडौं उडेका थिए । उनी ३ बजेको फ्लाइटमा काठमाडौं उडेका प्रदेश प्रहरी कार्यालयले जनाएको छ । उनी अर्को शनिवार विराटनगर फर्कने जनाइएको छ । 

डिआईजी शाह एक हप्तासम्म काठमाडौंमा रहनेछन् । डिआईजी शाहले अभियुक्तसँग भेटवार्ता गरेको विषयमा जिल्ला प्रहरी कार्यालय मोरङका प्रहरी अधिकारीले भने जानकारी नभएको बताएका छन् । 

प्रहरीले हिरासतमा रहेका पूर्व डिआईजी, एसपी र डिएसपीविरुद्ध संगठित अपराध, मानव अपहरण तथा कर्तव्य ज्यान मुद्दामा म्याद थप गरी अनुसन्धान गरिरहेको छ । 

प्रहरीले ३३ किलो सुन काण्डमा २७ जनालाई हिरासतमा लिएर अनुसन्धान गरिरहेको छ । 

वहालबाला र पूर्व उच्च प्रहरी अधिकारी समेत तानिएको सुनकाण्डका अभियुक्तलाई बहालवाला डिआईजीले गोप्य रुपमा भेट्नुलाई शंकाष्पद रुपमा हेरिएको छ । 

सुनकाण्डमा मारिएका सनम शाक्यका आफन्तहरुले भने डिआईजीले अनुसन्धानमा चलखेल गर्न सक्ने आरोप लगाएका छन् ।