२६ असार २०८३, शुक्रबार
काठमाडौं –सत्तारुढ नेपाल कम्युनिस्ट पार्टी (नेकपा)का नेता तथा डोटीबाट प्रतिनिधिसभा सदस्य रहेका प्रेम आलेलाई एक महिनाअगाडि एक आफन्तले फोन गरेर सोधे, ‘नेताजी मैले तपाईलाई १००० रुपैयाँको रिचार्जकार्ड पठाएको छु । फेरि ३००० रुपैयाँ पनि माग्नुभयो । साह्रै समस्यामा पर्नुभएको हो र ?’
आले भने छाँगाबाट खसेजस्तै भए । न त उनलाई कसैले रिचार्ज कार्ड पठाइदिएका थिए, न त कसैसँग उनले पैसा नै मागेका थिए ।
उनलाई अन्य व्यक्तिबाट पनि फोन आयो । कसैले ‘तपाईंलाई पैसा पठाइदिएको छु’ भन्थे भने कसैले ‘तपाईंको फेसबुक म्यासेन्जरमा रिचार्ज कार्डको पिन पठाइदिएको छु’ भन्थे ।
आलेको फेसबुक ह्याक गर्ने ह्याकरले ४० जनासँग फेसबुकबाटै रिचार्ज कार्डको पिन मागिसकेका रहेछन् । केही व्यक्तिले त ह्याकरले भनेको बैंक अकाउन्टमा पैसा समेत ट्रान्सफर गरेको आलेले लोकान्तरलाई बताए ।
‘दुई महिना हुन लाग्यो ह्याकरले मेरो फेसबुक अकाउन्ट ह्याक गरेर रिचार्ज कार्डको पिन र पैसा मगाउन थालेको,’ आलेले लोकान्तरसँग भने, ‘मैले यस विषयमा महानगरीय प्रहरी अपराध महाशाखामा निवेदन नै दिएको छु । तर उहाँहरूले पनि केही गर्न सक्नुभएको छैन ।’
फिल्म अभिनेतादेखि मोडेलसम्मको फेसबुक ह्याक
महानगरीय प्रहरी अपराध महाशाखामा दैनिक दर्ता हुने उजुरीमध्ये ४० प्रतिशत साइबर अपराध र सामाजिक सञ्जालको अकाउन्ट ह्याक भएको विषयसँग सम्बन्धित हुन्छन् । त्यसमध्ये पछिल्लो समय फेसबुक ह्याक भएका घटना बढ्दै गएको अपराध महाशाखाका प्रमुख प्रहरी वरिष्ठ उपरीक्षक (एसएसपी) धिरजप्रताप सिंह बताउँछन् ।
‘फेसबुक अकाउन्ट ह्याक गरेर विभिन्न अश्लील तस्बिर पोस्ट गर्नेदेखि ब्ल्याकमेल गर्नेसम्मका घटनाका उजुरी बढ्दै गएका छन्,’ एसएसपी सिंह भन्छन्, ‘उजुरी गर्ने व्यक्तिले उजुरी दिएपछि हामीले अनुसन्धान अगाडि त बढाउछौं । तर ह्याकरले सताउन छाडेपछि उजुरीकर्ताहरूले पनि त्यति चासो नदिने गरेकाले हामीले ह्याकरसम्मै पुग्न गाह्रो भइरहेको छ ।’
ह्याकरहरूबाट सताइनेमा नेतादेखि अभिनेतासम्मको सूची अपराध महाशाखामा छ । केही समयअगाडि अभिनेता आयुष्मान देशराज जोशी हप्तामा २ दिनजसो अपराध महाशाखा धाइरहन्थे ।
आयुष्मानले आफ्नो फेसबुकबाट आफूहरूसँग अश्लील कुराकानी गरेको भन्दै महाशाखामा उजुरी समेत परेको थियो । तर उनी पनि ह्याकरबाट पीडित भएका रहेछन् ।
कतिपयले त उनको नक्कली आइडी बनाएर युवतीसँग अश्लील कुराकानी गर्ने गरेको पनि भेटियो ।
अपराध महाशाखा स्रोतका अनुसार केही मोडेलहरू समेत ह्याकरबाट पीडित छन् । ह्याकरले आफ्नो फेसबूक ह्याक गरेर च्याटमार्फत् युवाहरूलाई नाङ्गो तस्वीर पठाएको विषयमा समेत केही अभिनेत्री र मोडेलहरूले महाशाखामा उजुरी दिएका छन् ।
प्रहरीभन्दा ह्याकर अगाडि
महानगरीय प्रहरी अपराध महाशाखाको साइबर सेलमा पीडितहरूको उजुरीको चाङ लागिसकेको छ । तर उजुरीमाथि छानबिन भएर समाधान भएका घटनाको संख्या भने एकदमै कम छ ।
प्राविधिक रूपमा विकसित हुन नसकेको प्रहरीभन्दा ह्याकर नै अगाडि रहेका देखिन्छन् । अपराध महाशाखा प्रमुख सिंह केही कानूनी र केही प्राविधिक जटिलताका कारण ह्याकरहरूलाई नियन्त्रणमा लिन नसकिरहेको स्वीकार्छन् ।
‘फेसबुक, ट्वीटरजस्ता सामाजिक सञ्जालसँग डिल गर्नलाई हामीसँग स्पष्ट कानूनी व्यवस्था नै छैन,’ एसएसपी सिंह भन्छन्, ‘नेपालमा आधिकारिक कार्यालय तथा प्रतिनिधि समेत नरहेका उनीहरूले हामीले भनेको समयमा विवरण पनि उपलब्ध गराउँदैनन् ।’
