काठमाडौं – प्रधानमन्त्री केपी शर्मा ओलीले मन्त्रिपरिषद्लाई 'डिजिटल’ बनाउन मन्त्रीलाई ल्यापटप बाँडे । ओली सरकारको मन्त्रिपरिषद्लाई कागजरहित बनाइएको दाबी गरिएको छ ।

ओली सरकारको ‘डिजिटल’ नारा सरकारी निवास बालुवाटारमा हुने मन्त्रिपरिषद् बैठकबाट सिंहदरबारसम्म पुग्न सकेको छैन । सिंहदरबारको दक्षिण गेटमा रहेको डिजिटल सूचना बोर्ड प्रयोगविहीन रहेको छ ।

डिजिटल बोर्डले काम नगर्दा भित्रबाट आफ्नो गेट पास आए/नआएकोबारे सोध्न झ्यालमै पुग्नुपर्ने अवस्था रहेको गेटमा भेटिएका चितवनका रामप्रसाद घिमिरे बताए । ‘सर्वसाधारण सिंहदरबार प्रवेश गर्न गेट पास लिने प्रत्येक झ्यालको माथितिर डिजिटल बोर्ड झुण्ड्याइएको छ,’ उनले भने, ‘बोर्ड झुण्डिएको मात्रै छ तर सेवाग्राहीहरूले आफ्नो नाम आयो कि आएन भनेर तँछाडमछाड गरेर सोध्नुपरेको छ ।’

सिंहदरबारमा रहेका डिजिटल प्रविधिलाई प्रयोग गर्नतिर ध्यान दिनुपर्ने उनले सुझाव दिए । गेटमा प्रवेश पासको लागि विभिन्न मन्त्रालयगत हिसाबले छुट्टाछुट्टै झ्यालमा व्यवस्था गरिएको छ । सिंहदरबार क्षेत्रभित्र रहेका कुनै पनि कार्यालयमा कामको विषय खुलाएर पासको लागि नाम टिपाउनुपर्ने हुन्छ ।

नाम टिपाइसकेपछि कार्यालय अनुसार बाहिरी गेटमा रहेका पास दिने कम्प्युटरमा नाम देखिन्छ तर कम्प्युटरमा नाम आए/नआएको डिजिटल बोर्डमा देखिनुपर्ने हो । डिजिटल बोर्ड प्रयोगमा नहुँदा सेवाग्राही झ्यालमै गएर नाम सोध्नुपर्ने र फर्किनुपर्ने झन्झटिलो अवस्था रहेको छ ।

पास लिने विधि र प्रक्रिया सेवाग्राहीले अनिवार्य रुपमा निर्वाह गर्नुपर्छ । तर सरकारले त्यसलाई सहज र व्यवस्थित बनाउन सकेको छैन । उपलब्ध प्राविधिक स्रोतसाधनलाई समेत प्रयोग गर्न नसक्दा सर्वसाधारणले सास्ती भोग्नुपरेको छ ।

प्रवेश पासको व्यवस्थापन महानगरीय सुरक्षा प्रहरी गण सिंहदरबारले गर्ने भएपनि डिजिटल बोर्डबारे थाहा नभएको त्यहाँका अधिकारी बताउँछन् । ‘म यहाँ आएको २ महिना मात्रै भयो । त्यो प्रविधि बिग्रेको र प्रयोगमा नआएको विषयमा मलाई जानकारी आएन,’ गणका डीएसपी राकेश सिंहले भने, ‘यदि त्यसो भएको छ भने त्यसको मर्मत गर्ने जिम्मेवारी पुनर्निर्माण प्राधिकरणको हो । म त्यहाँ तुरुन्त पत्राचार गर्छु ।’