२८ जेठ २०८३, बिहीबार
काठमाडौं – काठमाडौं उपत्यकाको बाहिरी चक्रपथ निर्माणका लागि ठेकेदार कम्पनी छनौट प्रक्रिया अगाडि बढेको छ ।
लगानी बोर्ड नेपालले सोमवार चक्रपथ निर्माणका लागि ठेकेदार कम्पनी छनौटका लागि ‘शर्ट लिस्टेड’ गरेको छ । लगानी बोर्डको सोमवारको बैठकले बाहिरी चक्रपथ निर्माणका लागि चीनको चाइना कम्युनिकेसन कन्स्ट्रक्सन कम्पनीलाई छनौट सूचीमा समावेश गरेको छ ।
बोर्डका प्रमुख कार्यकारी अधिकृत महाप्रसाद अधिकारीले बाहिरी चक्रपथ निर्माणका लागि ४ वटा कम्पनीको प्रस्ताव आएकोमा सोमवार बसेको बोर्डको बैठकले त्यसमध्ये एउटालाई मात्रै ‘शर्ट लिस्टेड’ गरेको बताए ।
‘बैठकमा पेश भएका प्रस्तावमध्ये ३ वटा योग्य देखिएनन्, एउटा चाइना कम्युनिकेसन कम्पनी योग्य देखिएकाले त्यसलाई हामीले शर्ट लिस्टेड गरेका छौं,’ उनले भने । लगानी बोर्डले विस्तृत कार्ययोजना प्रस्ताव माग गर्ने र प्रस्ताव उपयुक्त लागेमा ठेक्का सम्झौता गरिने जनाइएको छ ।
बोर्ड बैठकले निर्माण कम्पनी छनौट प्रक्रिया अगाडि बढाएकाले बाहिरी चक्रपथको काम अगाडि बढ्ने आशा जागेको चक्रपथ निर्माणको नियमन गरिरहेको काठमाडौं उपत्यका विकास प्राधिकरणले जनाएको छ । प्राधिकरणका सूचना अधिकारी केशवप्रसाद न्यौपानेले भने, ‘लगानी बोर्डबाट निर्णय भएकाले अब बाँकी प्रक्रिया अगाडि बढ्छ ।’
यसअघि आर्थिक वर्ष २०५५/०५६ मा १० वर्षभित्र सडक सञ्चालनमा ल्याउने योजनासहित सडक खण्डको प्रारम्भिक अध्ययन गरिएको थियो । सडक खण्डको डीपीआर २०६५ सालमा बनेको थियो । नेपालकै फूल ब्राइट कन्सल्टेन्सीले डीपीआर तयार पारेको थियो तर निर्माणका लागि कम्पनी छनौट, जग्गा अधिग्रहण लगायतका कारणले चक्रपथ आयोजनाको काम अगाडि बढ्न सकेको थिएन ।
उपत्यका विकास प्राधिकरणले चक्रपथ निर्माणका लागि पहिलो चरणमा सतुङ्गल–चोभार खण्डको जग्गा प्राप्तिका लागि आवश्यक निर्णय गरिदिन भन्दै शहरी विकास मन्त्रालयमा गत वर्ष पत्र पठाएको थियो ।
काठमाडौं उपत्यकाका ३ वटै जिल्लालाई जोड्ने उद्देश्यले बाहिरी चक्रपथ निर्माण गर्ने योजना सरकारले अघि सारेको थियो । ६६ किलोमिटर लम्बाइ रहने बाहिरी चक्रपथको १० खण्डमा काम गर्ने गरी योजना बनाइएको छ ।
