१२ साउन २०८३, मंगलबार
नेपालको कालापानीमा सीमा अतिक्रमण गरेको विरोधमा नेत्रविक्रम चन्द 'विप्लव' नेतृत्वको नेकपानिकट विद्यार्थी संगठन अखिल क्रान्तिकारीले आइतबार बुटवलमा विरोध प्रदर्शन गरेको छ ।
बुटवलको योगिकुटी, कालिकानगर, देवीनगर, मिलनचोकबाट विद्यार्थीहरूले एकसाथ जुलुश निकालेका थिए । कालापानी, लिम्पियाधुरा र लिपुलेक हाम्रो हो, भारतीय सेना नेपालभूमि छोड, लगायतका नारा लगाउँदै विद्यार्थीले विरोध जुलुश निकालेका हुन् ।
प्रहरीले उनीहरूले समातेका हसिया हथौडाका झण्डाहरू नियन्त्रणमा लिएको थियो । अनेरास्ववियु (क्रान्तिकारी) लुम्बिनी क्षेत्रीय समन्वय समितिको आयोजनामा विरोध जुलुश निकालिएको हो ।
विरोध जुलुशमा बुटवलका विभिन्न शैक्षिक संस्था तथा कलेजमा अध्ययनरत विद्यार्थीको सहभागिता रहेको थियो । स्कुल, कलेजको ड्रेससहित हातमा कापी र किताब छोपेका विद्यार्थीले प्रहरी प्रशासनलाई चुनौती दिँदै भारतका विरुद्ध चर्काचर्का नारा लगाए ।
बुटवलको मिलनचोक, चौराहा र कालिकानगरबाट प्रहरीलाई आन्दोलनकारी विद्यार्थीले झुक्काउदै जुलुश अगाडि बढेको थियो ।
भारतीय साम्राज्यवादी नीतिअनुसार नेपाली भूमि अतिक्रमण भएकाले अतिक्रमित भूमि फिर्ता गर्न आन्दोलनलाई जारी राखिने जुलुशमा सहभागी विद्यार्थीले बताएका छन् । अनेरास्ववियु (क्रान्तिकारी) लुम्बिनी क्षेत्रीय समन्वय समितिका संयोजक तथा केन्द्रीय सचिवालय सदस्य विरेन्द बिकले नेपाली भूमि फिर्ताका लागि आन्दोलन जारी राख्ने बताए ।
