स्थानीय तहको दरबन्दीमा लोक सेवा आयोगको परीक्षा पास गरी नियुक्ति लिन पुगेका केही कर्मचारीलाई स्थानीय तहहरूले फर्काइदिएका छन् ।

९ हजारभन्दा बढी कर्मचारीका लागि भएको परीक्षामा पास भएका करीब ४० जना कर्मचारीलाई सम्बन्धित स्थानीय तहले नियुक्ति नदिई फर्काइदिएको संघीय मामिला तथा समान्य प्रशासन मन्त्रलय स्रोतले जानकारी दियो ।

यसरी नियुक्ति नपाउनेमा अधिकृत स्तरका प्रशासन, लेखा र इञ्जिनीयरतर्फका कर्मचारी रहेका छन् ।

भर्खरै नियुक्तिको प्रक्रिया सञ्चालन भएकाले फिर्ता भएर आउने कर्मचारीको संख्या बढ्न सक्ने मन्त्रालयको अनुमान छ ।

यसरी कर्मचारीहरू फिर्ता भएको संघीय मामिला तथा सामान्य प्रशासन मन्त्रालयका प्रवक्ता भुपाल बरालले स्वीकारे ।

कर्मचारी समायोजनबाट पदपूर्ति भइसकेको भन्दै केही स्थानीय तहले कर्मचारीहरूलाई मन्त्रालयमा फिर्ता पठाएको प्रवक्ता बरालले लोकान्तरलाई जानकारी दिए ।

प्रवक्ता बरालका अनुसार कर्मचारी समायोजनबाट पदपूर्ति भइसकेका र पदरिक्त नभएकाले आवश्यक निर्देशन पाउँ भनी पत्रसहित कर्मचारीहरू मन्त्रालयमा आएका छन् । 

‘मन्त्रालयले विवरण संकलनको काम गरिरहेको छ, विवरण संकलन भइसकेपछि आवश्यक निर्णय गर्छौं । पद रिक्त भएको स्थानीय तहमा स्थानान्तरण गर्न सकिने विकल्प हुनसक्छ,’ प्रवक्ता बरालले लोकान्तरसँग भने ।

लोक सेवा आयोगले लिएको परीक्षामा एउटा स्थानीय तहको दरबन्दीमा उत्तीर्ण भएका कर्मचारीलाई अर्कोमा पठाउन कानूनी जटिलता छ ।

मन्त्रिपरिषद्बाट विशेष निर्णय गराएर मात्र यस्ता कर्मचारीलाई व्यवस्थापन गर्न सकिने मन्त्रालय स्रोत बताउँछ ।

लोक सेवा आयोगले स्थानीय तहका परीक्षा सञ्चालन गरी ९ हजार १ सय ६१ जना कर्मचारी छनोट गरेको थियो ।