२८ असार २०८३, आइतबार
नागरिकको स्वास्थ्यलाई सर्वोच्च प्राथमिकतामा राख्दै ललितपुर महानगरपालिकाले स्थानीय सरकारको इतिहासमै एउटा अभूतपूर्व र युगान्तकारी कदम चालेको छ । आगामी साउन १ गतेदेखि महानगरका नागरिकले बिरामी पर्दा अस्पताल धाउनुपर्ने बाध्यताको पूर्ण रूपमा अन्त्य हुने भएको छ।
आपत्कालीन अवस्थामा महानगरको पैसा नलाग्ने टोल-फ्री हटलाइन नम्बर ११३१ मा डायल गरेलगत्तै डाक्टर, नर्स र जीवनरक्षक औषधिसहितको एम्बुलेन्स सिधै नागरिकको घर-आँगनमा आइपुग्ने महानगरले जनाएको छ ।
सम्भावित प्राविधिक चुनौतीहरूलाई चिर्दै साउनको पहिलो दिनबाटै यो सेवा सञ्चालनमा ल्याउने महानगरको दृढ अठोटले अहिले नागरिकस्तरमा ठूलो उत्साह जगाएको छ ।
यस नवीन र अत्याधुनिक स्वास्थ्य अभियानअन्तर्गत महानगरले दुईवटा एम्बुलेन्सलाई 'घुम्ती अस्पताल'कै रूपमा हरदम तयारी अवस्थामा राख्नेछ ।
विपद्को घडीमा ११३१ मा घण्टी बज्नासाथ, सरकारद्वारा सिफारिस गरिएका अत्यावश्यक औषधि र अत्याधुनिक उपकरणसहितको स्वास्थ्यकर्मीको टोली द्रुत गतिमा बिरामीको घरमा पुग्ने ललितपुर महानगरपालिका प्रमुख चिरिबाबु महर्जनले जानकारी दिए ।
उनका अनुसार चिकित्सकले घरमै स्वास्थ्य परीक्षण गर्नेछन् र सम्भव भएसम्म त्यहीँ उपचार गर्नेछन् । यदि बिरामीको अवस्था जटिल भई विशेषज्ञ अस्पतालमै लैजानुपर्ने अवस्था आएमा पनि आत्तिनु नपर्ने उनले बताए ।
जटिल अवस्था देखिएमा चिकित्सकले पाटन अस्पताल, वीर अस्पताल वा शिक्षण अस्पतालजस्ता सुविधासम्पन्न 'रिफरल' अस्पतालहरूमा पूर्वजानकारी गराउनेछन् । त्यसपछि, सुरक्षित रूपमा बिरामीलाई अस्पतालको शय्यामै पुर्याउने सम्पूर्ण प्रबन्ध उक्त टोलीले मिलाउने प्रमुख महर्जनले जानकारी दिए ।
प्रमुख महर्जनका अनुसार यो सेवा अत्यन्तै समावेशी र फराकिलो छ । जीपीएस (GPS)मार्फत पहिचान गरिएका ८७ हजार घरधुरी र २०७८ सालको जनगणनाअनुसारका २ लाख ९४ हजार आवासीय जनसङ्ख्याले त यो सुविधा पाउने नै छन्; यसका साथै महानगरका २९ वटै वडाभित्र बसोबास गर्ने सम्पूर्ण अस्थायी बासिन्दा तथा व्यापारिक समुदायले समेत यो सुविधा समान रूपमा उपभोग गर्न पाउनेछन् । अर्थात, ललितपुर महानगरको भौगोलिक सीमाभित्र रहेको जोकोहीले पनि आपतका बेला यो सञ्जीवनी सेवाको पूर्ण लाभ लिन सक्नेछन् ।
हेर्नुहोस्, भिडियो :
