भारतीय मूलका मतदातालाई रिझाउने ट्रम्पको प्रयास, मोदीसँग देखिने

भदौ ३०, २०७६

काठमाडौं – अमेरिकाका राष्ट्रपति डोनल्ड ट्रम्प सेप्टेम्बर २२ मा टेक्सासको ह्युस्टनमा हुने हाउडी मोदी कार्यक्रममा प्रमुख अतिथि बन्ने भएका छन् । 

उक्त कार्यक्रममा भारतका प्रधानमन्त्री नरेन्द्र मोदीले अमेरिकाको भ्रमणमा भारतीय समुदायलाई सम्बोधन गर्ने भएका छन् । त्यसमा ५० हजारभन्दा बढी मानिसले भाग लिने भएका छन् । 


ADVERTISEMENT

ट्रम्प र मोदीले संयुक्त रूपमा ठूलो कार्यक्रमलाई सम्बोधन पहिलोपटक गर्ने भएका छन् । 

सन् २०२० मा अमेरिकामा राष्ट्रपति चुनाव हुने भएको छ । अमेरिकामा लगभग ५० लाख भारतीय मूलका मानिस बस्छन् र उनीहरूको मत निर्णायक हुन सक्ने भएकाले ट्रम्पले मोदीसँगको कार्यक्रममा देखिन मन गरेको विश्लेषकहरूले बताएका छन् । 

त्यसो त हाउडी मोदी कार्यक्रममा मोदीसँग रिपब्लिकन र डेमोक्रेट दुवै दलका सांसद देखिनेछन् । 

सन् २०१६ को चुनावमा पनि ट्रम्पले अबकी बार ट्रम्प सरकार लगायतका नारा दिएर भारतीय मूलका मतदातालाई आकर्षित गर्ने कोशिश गरेका थिए । 

टेक्सास अमेरिकाको दोस्रो सबभन्दा ठूलो राज्य हो । त्यहाँ ४ प्रतिशत मतदाता एसियाली मूलका छन् र अधिकांश संख्या भारतीय समुदायका छन् ।

विगतका केही चुनावमा एसियाली भारतीय मतदाताहरूले डेमोक्रेट्सलाई पत्याइरहेको देखिन्छ । रिपब्लिकन पार्टीले उनीहरूलाई लोभ्याउने हरसम्भव प्रयास गरिरहेको हुन्छ ।

एजेन्सी
 

भदौ ३०, २०७६ मा प्रकाशित

प्रतिक्रिया दिनुहोस