लक-डाउनमा सुत्केरीलाई पोखरा महानगरको ‘नौलो’ सहयोग

पोखरा महानगरपालिकाले सुत्केरी महिलालाई नौलो खालको सहयोग सुरु गरेको छ । लकडाउनका बेला सुत्केरीले अब घ्यू, हर्लिक्स, तेल, साबुनसहित नगद ५ सय रुपैयाँ पाउने भएका हुन् ।

सोको पहिलो चरणमा आइतबार १८ जना सुत्केरीलाई भेटी पौष्टिक आहाराको रुपमा ती सामग्रीसहित नगद हस्तान्तरण गरिएको छ । अभिभावकीय भूमिका निर्वाहका लागि यस्तो खालको सहयोग सुरु गरिएको महानगरले जनाएको छ ।

हालसम्म २६ जना सुत्केरीको नाम महानगरको हटाइन नम्बररमार्फत टिपाइएकोमा आइतवार पोखरा वडा ९, १० र १५ का सुत्केरीलाई भेट गरिएको थियो । सुत्केरी महिलाहरुलाई आवश्यक पर्ने पौष्टिक आहार अभाव भएको गुनासो आएपछि महागनरले १५ सय रुपैयाँ बराबरको प्याकेजसहित नगद ५ सय रुपैयाँ दिने निर्णय गरेको पोखरा महानगरका उपप्रमुख मञ्जुदेवी गुरुङले बताइन् ।

सुत्केरी प्याकेजमा नाम टिपाउने सबैलाई उपलब्ध गराउने निर्णय भएको उनको भनाइ छ । उनले भनिन्, ‘यसलाई राहतभन्दा पनि सुत्केरी अवस्थालाई मध्यनजर गरेर पोषिलो खाना आवश्यक पर्ने भएकाले उपलब्ध गराउने छौं ।’

नाम टिपाएका सबैलाई घरघरमै पौष्टिक आहार पु¥याइनेछ । आइतबार पोखरा १५ मा वडाध्यक्ष प्रकाश पौडेल, वडासदस्य पार्वती कार्की, महागनरका कर्मचारी शर्मिला भण्डारी र रेवती भण्डारीले सुत्केरी महिलाको घरमै पुगेर औष्टिक आहार उपलब्ध गराएका हुन् ।

वडा १० मा वडासदस्य सम्मरबहादुर श्रेष्ठ लगायत कर्मचारी सहित पुगेर पौष्टिक आहार उपलब्ध गराए । कोरोना भाइरसको जोखिम न्यूनीकरणका लागि सरकारले लागू गरेको लकडाउनयता पोखरा महानगरले दैनिक ज्यालादारी गर्ने तथा विपन्न वर्ग गरी हालसम्म करिब ३१ हजार बढीलाई राहत वितरण गरेको जनाएको छ ।