जिल्ला प्रहरी कार्यालय बैतडीको सुरक्षा घेरादेखि जिल्ला सरकारी वकिल कार्यालय र जिल्ला अदालतको न्यायिक घेरा कोरोनाको प्रहारबाट जोगिएको छ ।

जिल्ला प्रहरी कार्यालयमा कार्यरत प्रहरीसहित ४६ जनाको पीसीआर रिपोर्ट नेगेटिभ आएपछि जोगिन पुगेको हो । सो प्रहरी कार्यालयको थुना रहेका व्यक्तिमा नै कोरोना संक्रमण देखिएपछि कार्यरत प्रहरी र संक्रमितको बयान लिने सरकारी वकिलदेखि अदालतका कर्मचारीहरुको कन्ट्याक्ट ट्रेसिङ गरिएको थियो ।

जिल्ला स्वास्थ्य कार्यालय बैतडीका कोरोना सम्पर्क व्यक्ति भुवनप्रसाद जोशीले धनगढी प्रयोगशालाको पीसीआर परीक्षण रिपोर्ट अनुसार ४६ जनाको रिपोर्ट नेगेटिभ आएको जानकारी दिए ।

जिल्लाको शिवनाथ गाउँपालिका १ घर भएका २२ वर्षीय ती युवकको परिवारसहित छिमेकीहरुको भने रिपोर्ट आउन बाँकी रहेको जोशीले बताए ।

जेठ ९ गतेको धनगढी प्रयोगशालाको पीसीआर परीक्षण नतिजाले ती युवकमा संक्रमण देखा परेपछि सुरक्षा तथा न्यायिक अंगलाई झस्काएको थियो । ती युवक जिल्ला प्रहरी कार्यालय बैतडीको थुनामा २२ दिनसम्म बसेका थिए ।

उनमा संक्रमण देखिए लगत्तै जिल्ला प्रहरी कार्यालय नै ‘सील’ गरिएको थियो । नेपालमै पहिलो पटक जिल्लाकै प्रमुख सुरक्षा अंग सील भएको थियो । जिल्ला प्रहरी कार्यालय बैतडीका प्रहरी नायव उपरीक्षक डिल्लीनारायण पाण्डेले थुनुवामा संक्रमण देखिएपछि कार्यालयमा कार्यरत ६० जना प्रहरीमध्ये मुद्धा शाखामा कार्यरतसहित ३२ जनाको पीसीआर परीक्षणको लागि स्वाब संकलन गरेर परीक्षण गरेको बताए ।

ती सबैको रिपोर्ट नेगेटिभ आएको सम्पर्क व्यक्ति जोशीले पुष्टि गरे । ती युवक गत चैत्र ६ गते भारतबाट फर्किएका थिए । उनी वैशाख १५ गते कर्तव्य ज्यान मुद्धामा प्रहरीको नियन्त्रणमा परेका थिए ।

कर्तव्य ज्यान मुद्धामा पक्राउ परेका उनलाई बयानको लागि सरकारी वकिलको कार्यालयदेखि अदालतसम्म हाजिर गराइएको थियो । फलतः कट्याक्ट ट्रेसिड्डको दायरामा सरकारी वकिलको कार्यालयदेखि अदालतसम्मका कर्मचारी पर्न गएका थिए । स्वास्थ्य अवस्था सामान्य रहेका ती युवकलाई हाल जिल्ला अस्पताल बैतडीको आइसोलेसनमा राखिएको छ ।

पढ्नुहोस यो पनि - सुदूरपश्चिममा पुनः थपिए ५ कोरोना संक्रमित, थुनुवामै देखिएपछि प्रहरी कार्यालय ‘सील’