गण्डकी प्रदेशअन्तर्गत स्याङ्जामा पहिलोपल्ट कोरोना संक्रमित देखापरेका छन् ।

भारतको गुजरात प्रान्तबाट जेठ १० गते नेपाल आएका २२ र २८ वर्षका संक्रमित दुवै पुरुष हुन् ।

स्याङ्जा प्रवेश गरेदेखि नै वालिङस्थित क्वारेन्टाइनमा राखिएका व्यक्तिको सोमवार राति स्वाब परीक्षणमा पोजेटिभ देखिएको हो । 

स्वास्थ्य तथा जनसंख्या मन्त्रालय र गण्डकी प्रदेश स्वास्थ्य निर्देशनालयले सोबारे पुष्टि नगर्दै स्याङ्जाबाट प्रतिनिधित्व गर्ने २ सांसदले गण्डकी प्रदेश सभामा सोबारे जानकारी दिँदै उच्च सुरक्षाको माग गरेका थिए । सांसद भागवत्प्रकाश मल्ल र मोहनप्रसाद रेग्मीले सोमवार पोखरा सभागृहस्थित गण्डकी प्रदेश सभाको बैठकमा सोबारे जानकारी दिएका थिए । 

त्यसको केही घण्टापछि स्वास्थ्य तथा जनसंख्या मन्त्रालयले नियमित पत्रकार सम्मेलनमा नेपालमा सोमवार देखिएका ९० नयाँ संक्रमितमध्ये स्याङ्जाका पनि ती २ जना भएको पुष्टि गरेको हो ।
 
भारतबाट नेपाल प्रवेश गर्ने सिमानामा अलपत्र परेकालाई स्वदेश फर्कन दिने क्रममा संक्रमितहरू पनि जेठ १० गते नेपाल प्रवेश गरेका थिए । संक्रमितमध्ये २२ वर्षीय युवकको स्वास्थ्य अवस्था सामान्य रहेपनि अर्का २८ वर्षीय युवकको स्वास्थ्यमा समस्या देखिएको जनाइको छ । दुवै जना स्याङ्जाको केवरे भञ्ज्याङका हुन् । 

जिल्लामा पहिलोपल्ट कोरोना संक्रमित देखिएपछि सतर्कता अपनाइएको स्याङ्जाका निमित्त प्रमुख जिल्ला अधिकारी (सीडीओ) ध्रुव गिरीले जानकारी दिए ।

पोखरास्थित पोखरा स्वास्थ्य विज्ञान प्रतिष्ठानको प्रयोगशालामा भएको पीसीआर परीक्षणमा पहिलोपल्ट कोरोना संक्रमित देखिएको छ । चीनबाट विश्वभर फैलिएको कोरोना भाइरस नेपालमा ९ माघमा देखिएको हो ।

नेपाल सरकारले कोरोना परीक्षण प्रदेशस्तरमा विस्तार गरेपछि गण्डकी प्रदेश राजधानी पोखरामा १८ चैतेदेखि पीसीआर परीक्षण हुँदै आएको छ । झण्डै २ महिना अवधिमा मात्र २ हजार जनाको परीक्षण भएको छ । आरडीटी ७ हजार पुगेको गण्डकी स्वास्थ्य निर्देशनालयले जनाएको छ । 

मुख्यमन्त्री पृथ्वीसुव्वा गुरुङले भने प्रदेशको बजेट अधिवेशनको पहिलो दिन पीसीआर मशिन थपेर परीक्षण दर बढाउने बताएका थिए । गण्डकीमा देखिएका २ नयाँ संक्रमितसहित प्रदेशमा कुल संक्रमित संख्या ७ जना पुगेको छ । तीमध्ये बागलुङका २ जना महिला उपचारपछि निको भइ घर फर्केका हुन् ।
 
गण्डकीमै जेठ १ गते नवलपुर देवचुली–१२ का ४९ वर्षीय पुरुषमा कोरोना पुष्टि भयो भने जेठ ६ गते लमजुङ घर भई काठमाडौं–१६ वनस्थली बस्ने ३ वर्षीय बालकलाई कोरोना संक्रमण देखा पर्‍यो । 

जेठ ९ गते नवलपुरका विनय त्रिवेणी नगरपालिकाका ४५ वर्षीय पुरुषमा कोरोना संक्रमण देखिएको स्वास्थ्य मन्त्रालयले पुष्टि गरेको छ ।

लमजुङका संक्रमित बालकको काठमाडौं र नवलपुरका २ संक्रमितको चितवनस्थित भरतपुर कोरोना विशेष (अस्थायी) अस्पतालको आइसोलेसनमा उपचार भइरहेको गण्डकी प्रदेश स्वास्थ्य निर्देशनालयले जनाएको छ ।