नेपालमा कोभिड–१९ बाट पहिलो पटक विदेशी नागरिकको मृत्यु घटना सार्वजनिक भएको छ । काठमाडौंको महाराजगञ्जस्थित त्रिवि शिक्षण अस्पतालमा ४८ वर्षीया चिनियाँ महिलाको बुधबार मृत्यु भएको स्वास्थ्य तथा जनसंख्या मन्त्रालयले नियमित प्रेस ब्रिफिङमा जनाएको हो ।

कोभिड–१९ बाट ज्यान गुमाउने ती चिनियाँ नागरिक भने पोखरामा बस्दै आएकी थिइन् । उनले पर्यटकीय सहर पोखरा लेकसाइडमा केही वर्षदेखि रेष्टुरेन्ट चलाउँदै आएको खुलेको छ । साथै उनी १ वर्षदेखि चीन फर्केकी थिइनन् ।

कुनै पनि ट्राभल हिस्ट्री नभएकी ती नागरिकमा कसरी कोरोना भेटियो भन्नेबारे पोखरास्थित स्वास्थ्य निर्देशनालयका अधिकारी पनि अचम्मित छन् । स्वास्थ्य निर्देशक डा. विनोदबिन्दु शर्माले स्वास्थ्यमा समस्या देखिएपछि काठमाडौं रेफर गरिएकी ती नागरिकमा कोरोना पुष्टि भएको आफूले जानकारी पाएको र कसरी कोरोना संक्रमण भेटियो भन्नेबारे कन्ट्याक्ट ट्रेसिङ थाल्ने जनाए ।

स्वास्थ्यमा समस्या देखिएपछि गत सुरुवातमा पोखराको मणिपाल शिक्षण अस्पताल भर्ना भएकी उनलाई साउन २ गते थप उपचारका लागि हेलिकोप्टरमार्फत काठमाडौस्थित ग्रान्डी अस्पताल लगिएको थियो । काठमाडौं पु¥याएपछि पीसीआर परीक्षण क्रममा कोरोना पुष्टि भएको स्वास्थ्य तथा जनसंख्या मन्त्रालयले जनाएको छ ।

कोरोना पुष्टि भएपछि उनलाई शिक्षण अस्पताल महाराजगञ्जस्थित सघन उपचार कक्षमा लगिएकोमा बुधबार मृत्यु भएको हो । यसअघि, पोखराबाट हेलिकोप्टरमार्फत काठमाडौंको ह्याम्स अस्पतालमा उपचारार्थ भर्ना भएका ६० वर्षीय पुरुषमा कोरोना पुष्टि भएको थियो ।

संयोगवश उनी उपचारपछि निको भइ घर फर्केका छन् । ती पुरुष कोभिड–१९ संक्रमण पुष्टि हुने पोखरामै पहिलो केस थियो । गण्डकीमा हालसम्म १ हजार ३ सय ४५ कोरोना संक्रमित रहेकोमा ४ जनाको मृत्यु भएको छ । संक्रमितमध्ये १ हजार ९१ जना निको भइ घर फर्केका छन् ।