स्याङ्जाका प्रहरी प्रमुख प्रहरी उपरीक्षक (एसपी) सहित १८ जना प्रहरी कर्मचारीमा कोरोना पुष्टि भएको छ ।

संक्रमित सबै जिल्ला प्रहरी कार्यालय स्याङ्जामा कार्यरत छन्, तीमध्ये १ जना महिला हुन् । 

स्याङ्जाका स्वास्थ्य कार्यालय प्रमुख यामप्रसाद शर्माले गत साउन ६ गते हवल्दार र सिपाहीमा कोरोना पुष्टि भएपछि कार्यालयमा कार्यरत प्रहरी र थुनुवा सबै १०२ जनाको स्वाब संकलन गरी पोखरामा परीक्षण गरिएकोमा १८ जनामा कोरोना देखिएको बताए । अझै ८४ जनाको रिपोर्ट आउन बाँकी छ ।

संक्रमित एसपी आफ्नै निवासमा आइसोलेसनमा बस्न थालिसकेका छन् भने बाँकी १७ जनालाई भीरकोट–१ हेलुस्थित कालिका सामुदायिक अस्पतालमा लैजाने तयारी गरिएको छ ।

जिल्ला प्रहरी कार्यालयका प्रवक्ता प्रहरी नायव उपरीक्षक (डीएसपी) राजेन्द्रप्रसाद अधिकारीका अनुसार सेवामा खटिने क्रममा कहाँ कसरी कोरोना पुष्टि भयो भन्नेबारे यकिन भन्न सकिएको छैन । सबैको साउन ७ गते स्वाब संकलन गरी पोखरास्थित पश्चिमाञ्चल क्षेत्रीय अस्पतालको प्रयोगशालामा पठाइएको थियो । अरु ८४ जनाको रिपोर्ट अझै नआइसकेको उनले बताए । जिल्ला प्रहरी कार्यालयमा प्रहरी कर्मचारी हाल ९८ जना कार्यरत छन् । बाँकी ४ जना थुनुवा हुन् ।

गत हप्ता जिल्लामा कार्यरत प्रहरीमा कोरोना देखिएपछि कार्यालय नै सील गरी सुरक्षा व्यवस्था अपनाइएको थियो ।

स्याङ्जाका प्रमुख जिल्ला अधिकारी गंगाबहादुर क्षेत्रीले कार्यालय प्रमुखसहित २१ प्रहरीमा कोरोना देखिएपछि पुतलीबजारमा कडाइ गरिएको जानकारी दिए । उनले पहिलो चरणमा प्रहरी प्रमुखदेखि जवानसम्मको स्वाब लिइएको र सम्पर्कमा आएकाको खोजी शुरू गरिएको बताए ।

स्याङ्जामा हालसम्म कोरोना संक्रमितको संख्या २२३ पुगेको छ । तीमध्ये १८८ निको भइ घर फर्केका छन् । २ जना कोरोना संक्रमित पुरुषको मृत्यु भएको छ । गण्डकी प्रदेशमा भने कूल संक्रमित संख्या करीब १ हजार ४०० पुगिसकेको छ ।