२१ असार २०८३, आइतबार
अयोध्यामा राम मन्दिरको निर्माण तीव्र गतिमा बढ्दै जाँदा दशहराको अवसर पारेर भव्य रामलीला आयोजना गरिने भएको छ ।
मञ्च निर्माणका लागि रामलीला आयोजकका तीन सदस्यहरू नयाँ दिल्लीबाट मंगलवार अयोध्या पुगेका छन् ।
नौ दिनसम्म चल्ने रामलीला सरयू नदीको किनारमा रहेको लक्ष्मण किल्लामा अर्को महिना अर्थात् अक्टोबर १७ देखि २५ सम्म आयोजित गरिनेछ । त्यसमा बलिउडका कलाकारहरूले विभिन्न भूमिका निर्वाह गर्नेछन् ।
रामानन्द सागरको धारावाहिक रामायणमा हनुमानको भूमिकामा रहेका दारा सिंहका छोरा विन्दु दारा सिंह अयोध्याको रामलीलामा हनुमान बन्नेछन् ।
उत्तरपूर्वी दिल्लीबाट भाजपा सांसद मनोज तिवारीले अंगदको भूमिका निर्वाह गर्नेछन् भने भोजपुरी कलाकार तथा गोरखपुरका सांसद रवि किशनले भरतको भूमिका खेल्नेछन् ।
सोनु सागरले राम र कविता जोशीले सीताको भूमिका निर्वाह गर्नेछन् । बलिउडका महान् कमेडियन असरानी नारद मुनिको भूमिकामा देखिनेछन् । रजा मुराद, शाहबाज खान, अवतार गिल, राजेश पुरी र राकेश बेदी पनि रामलीलामा सहभागी हुनेछन् ।
त्यतिखेरसम्म कोभिड–१९ महामारी मत्थर भएछ भने दर्शकहरूलाई रामलीला हेर्न बोलाइनेछ । नत्र हप्ताभरि चल्ने रामलीलालाई फेसबूक, यूट्युब र इन्स्टाग्राममा लाइभ गरिनेछ । दूरदर्शन तथा मनोरञ्जन च्यानलहरूमा पनि यसको प्रत्यक्ष प्रसारण गरिनेछ ।
