क्यान्सर र मुटुरोगको प्रमुख कारण धुम्रपान हो । चुरोट पिउने मान्छेले शरीरमा निकोटिन थुपार्छ । निकोटिन लागूपदार्थ हो र यसलाई छोड्न धेरै गाह्रो हुन्छ ।

धेरैजनाले धुम्रपान त्यागनका लागि अनेकौं उपाय अपनाउँछन् । तर यहाँ तल दिइएका केही भोजनले तपाईंलाई चुरोटको तलतल लाग्न दिँदैनन् ।

तरकारी
गाजर, बुर्काउली, काँक्रो र ज्वानो जस्ता कुरा मरङमरङ चपाउन मिल्ने भएकाले तपाईंलाई चुरोटको तलतलबाट छुटकारा मिल्छ । नियमित यी कुरा खानुभयो भने तपाईंलाई चुरोट बेस्वादे लाग्छ ।

अदुवा
चुरोटको तलतल छोड्ने यो सबभन्दा प्रभावकारी वस्तु हो । एक टुक्रा अदुवालाई पिँधेर त्यसमा एक चम्चा चिनी हाल्नुस् अनि नियमित खानुस् । तपाईंले धुम्रपान बिर्सनुहुनेछ ।

सुन्तला
छिट्टो धुम्रपान त्याग्न चाहनुहुन्छ भने सुन्तला खान थाल्नुस् । सुन्तलाको जुस पनि त्यत्तिकै प्रभावकारी हुन्छ । यसमा भएको भिटामिन सीले चुरोटका कारण पुगेको क्षतिलाई न्यूनीकरण गर्छ ।

नुनिलो खानेकुरा
नुनिलो खानेकुरा खानुभयो भने चुरोट पिउन मन लाग्दैन । चुरोट तान्न मन लागेको बेलामा कि नुन चाट्नुस् कि नुनिलो खानेकुरा खानुस् ।

गोलभेडा
गोलभेडाको सुगन्धले चुरोटको गन्धलाई घटाउँछ । टमाटरको जुस पिउँदा चुरोट पिउँदा जत्तिकै मजा आउँछ अनि कुनै हानि पनि हुँदैन । आखिर टमाटर र सुर्ती एउटै प्रजातिका बोटबिरुवा हुन् ।

काजुबदाम
चुरोट तान्ने भनेको मुखलाई हल्लाएर सन्तुष्टि लिने काम न हो । काजुबदाम चपाउँदा पनि तपाईंको मुख हल्लेर व्यस्त बनाउँछ र चुरोट छुटाउँछ ।

जौ
धुम्रपान गर्नेले एक्कासि चुरोट खान छोड्दा रगतमा चिनीको मात्रा घट्छ जसका कारण उनीहरूलाई चरक्क टाउको दुख्छ र चक्कर आउँछ । यस्तोबेलामा जौ खाँदा निकोटिनतिर फर्किन मन लाग्दैन ।

दूध
दूधले तपाईंको स्वास्थ्यलाई लाभ हुने धेरै भूमिका खेल्छ । नियमित एक गिलास दूध पिउँदा तपाईंलाई धुम्रपान गर्न मन लाग्दैन ।