२८ असार २०८३, आइतबार
युक्रेनमा आठ वर्षकी एक ब्लगरले १३ वर्षका बालकसँग डेटिङ गरिरहेको जानकारी दिएपछि हंगामा मच्चिएको छ ।
आफूलाई आमाले नै डेटिङको अनुमति दिएको ती बालिकाको भनाइ छ । आमाले नै छोरीका सबै सामाजिक सञ्जाल अकाउन्टहरू नियन्त्रण गर्छिन् ।
मिलाना माखानेट्स नामक ती बालिकाको लाइकी नामक यापमा लगभग ७० लाख फलोअर छन् । लाइकी भनेको टिकटक जस्तै भिडियो शेयरिङ याप हो । रुस र युक्रेनका बालबालिकामाझ यो लोकप्रिय छ ।
मिलाना मोडल पनि हुन् र उनी बालबालिकाको फेशन शोहरूमा पनि भाग लिइरहेकी हुन्छिन् ।
इन्स्टाग्राममा मिलानाले मस्कोमा बस्ने पाशा पाइ नामक १३ वर्षीय ब्लगरसँग रोमान्टिक सम्बन्ध गाँसेको भन्दै पोस्ट गरेकी थिइन् । पछि उनले पोस्ट डिलिट गरिन् । इन्स्टाग्राममा मिलानाका चार लाख ८६ हजार फलोअर छन् ।
हालैका दिनमा मात्र उनीप्रति मूलधारको मिडियाको ध्यानाकर्षण भए पनि उनी र पाशाको सम्बन्ध लामै समयदेखि चलिरहेको छ । इन्स्टाग्राम स्टोरीहरूमा उनीहरूले एकअर्कालाई चुम्बन गरिरहेको र एउटै खाटमा सुतेको तस्वीर समेत राख्ने गरेका छन् ।
यसको समाचार आएपछि आपत्तिजनक फोटो र भिडियोहरू हटाइएको थियो । मिलानाकी आमा दारियाले छोरीको प्रोफाइल चलाउँछिन् र उनलाई कठोर आलोचना गरिएको छ ।
आफ्नी छोरीलाई यौनको वस्तु बनाएको भन्दै विभिन्न प्रयोगकर्ताहरूले दारियामाथि शाब्दिक आक्रमण गरेका छन् ।
