२२ असार २०८३, सोमबार
जापानका एक पुरुषले ३५ जना महिलासँग गम्भीर सम्बन्धको ढोङ गरेको अनि उपहार पाउनका लागि आफ्नो जन्मदिन ढाँटेको खुलासा भएपछि प्रहरीले पक्राउ गरेको छ ।
ती सबै महिला एकजुट भएर पुरुषलाई एक्सपोज गरेको स्थानीय सञ्चारमाध्यमले जनाएका छन् ।
ताकाशी मियागावा नामक ती पुरुष दक्षिणी जापानको कान्साइ क्षेत्रका हुन् र उनले एकैपटकमा ३५ महिलासँग सम्बन्ध राखेका थिए ।
प्रहरीका अनुसार, मियागावाको जन्मदिन नोभेम्बर १३ मा पर्छ । तर उनले तीन प्रेमिकालाई फेब्रुअरी, जुलाई र अप्रिलमा जन्मदिन पर्छ भन्दै ढाँटेका थिए ।
मियागावा विभिन्न महिलासँग फरकफरक रेस्टुराँमा देखिएको तस्वीर समेत सार्वजनिक भएका छन् ।
उनले कपडा र पैसा गरी लगभग एक हजार डलर बराबरको उपहार हात पारेको प्रहरीको विश्वास छ ।
मियागावाले एक मार्केटिङ कम्पनीका लागि शावरको सामान बेच्ने गरेका थिए र त्यसैक्रममा महिलाहरूलाई भेटेका थिए । उनले एकल महिलालाई लक्षित गर्ने र छिट्टै बिहे गर्ने प्रलोभन दिने गरेको पाइयो ।
पछि सबै महिला एकजुट भएर उनलाई एक्सपोज गरे । उनीहरूले कसरी ती व्यक्तिको बारेमा थाहा पाए भन्ने खुलेको छैन ।
