२१ असार २०८३, आइतबार
कोरोनाभाइरसका विषयमा सामाजिक सञ्जालमा अनेकथरी हल्ला फैलिरहेका हुन्छन् ।
ती हल्लालाई पत्याउने गौप्राणीहरू पनि समाजमा छन् । भारतको भोपालमा यस्तै एक सोझा युवक कोरोना लागेपछि सामाजिक सञ्जालमा आफ्नो परिचित मानिसको मूर्ख सल्लाहका कारण ज्यान गुमाउन पुगेका छन् ।
अशोका गार्डनमा बस्ने ती ३० वर्षीय युवकलाई ज्वरो आएपछि कोरोना लाग्यो भन्ठाने । अनि उनले चिनेजानेको एक मानिससँग सल्लाह लिएर मट्टितेल पिए । त्यसो गरेको चार दिनपछि उनको मृत्यु भयो । मृतक युवकको कोरोना रिपोर्ट नेगेटिभ आएको छ ।
जुन महिनामा विवाहको पहिलो वर्षगाँठ मनाउन लागेका युवकको अकालमा ज्यान गयो । मट्टितेल पिएपछि अस्पताल भर्ना गरिएका युवकको त्यहीँ नै मृत्यु भएको हो ।
चिकित्सकहरूका अनुसार, शुरूमै सही औषधि परेको भए युवकको ज्यान जोगिन सक्थ्यो ।
