मध्यान्ह १२ बजे त्रिभुवन विमानस्थलबाहिर चहलपहल बढ्दै थियो । कोही पीसीआर रिपोर्टमा छाप हान्न लाइनमा थिए भने कोही विमान चढ्ने तयारीमा । 

यात्रुहरू रातो टीकाले निधार रंग्याएका थिए भने काँधमा खादा र माला । ‘दशैंको मुखमा विदेशिनु पर्दा नराम्रो त लागिहाल्छ नि,’ प्रतीक्षा संग्रौलाले लोकान्तरसँग भनिन् । 

प्रतीक्षा र उनका दाइ पर्ने पुस्कर भण्डारी पढ्नका लागि लण्डन जाँदै रहेछन् । छोरीलाई विमानस्थलसम्म पुर्‍याउन आएकी प्रतीक्षाकी आमाले टीकाको मुखमै बिदाइ गर्नुपर्दा दुःख लागेको सुनाइन् । ‘जति दुःख लागे पनि पठाउनै पर्‍यो,’ उनले भनिन् । 

प्रतीक्षासँगै लण्डन जान लागेका पुष्करले चाडबाडका बेला देश छाड्दा दुःख लागे पनि आफ्नो करिअरका लागि विदेश जान पाउँदा खुशी लागेको बताए । 

यस्तै कास्की घर बताउने एक यात्रु बेरोजगार भएर धेरै बस्न नसक्ने भएपछि विदेश जान थालेको बताए । ‘कम्पनीको साहूलाई दशैंपछिको टिकट काट्न भनेको थिएँ,’ उनले भने, ‘तर टिकट अगाडि नै भएकाले जानै पर्ने अवस्था आयो ।’

बाँकेका पदमबहादुर बुढाले पनि घरपरिवारसँग दशैं मनाउन नपाएको ६ वर्ष भएको बताए । यसपालि भने उनले दशैं मनाउन पाउने आश गरेका थिए । ‘यसपालि पनि यस्तै भयो, धेरै नमज्जा लागिरहेको छ,’ उनले भने, ‘अब अर्को वर्ष राम्रैसँग मनाउँला ।’

हिन्दू नेपालीहरूको महान चाड दशैंका बेला घरबाहिर रहेका मानिसहरू घर फिर्छन् । तर, केही युवाहरू दशैंको मुखमै भए पनि विदेशिनु परेको छ । 

आफ्नो करिअर होस् वा वैदेशिक रोजगारीका लागि दिनहुँ नेपाली युवाहरू देश छाड्नुपर्ने बाध्यता छ ।