२९ जेठ २०८३, शुक्रबार
भारतीय प्रधानमन्त्री नरेन्द्र मोदीको निमन्त्रणमा शुक्रवार भारत भ्रमणमा आउन लागेका प्रधानमन्त्री शेरबहादुर देउवाको स्वागतका लागि तयारी पूरा भएको छ ।
तीन दिने भ्रमणका लागि देउवा शुक्रवार दिउँसो २ः५० मा नयाँ दिल्लीमा अवतरण गर्ने कार्यक्रम छ ।
देउवाको स्वागतका लागि नयाँ दिल्लीको सडकमा भारतीय प्रधानमन्त्री मोदीसहितका तस्वीर राखिएका छन् । यस्तै नेपाल र भारतका झण्डा पनि राखिएका छन् ।
भारतको विदेश मन्त्रालयले बिहीवार प्रधानमन्त्री देउवाको भ्रमणको कार्यतालिका सार्वजनिक गरेको छ ।
नयाँ दिल्ली आएलगत्तै देउवाले सबैभन्दा पहिले भारतीय विदेशमन्त्री डा. एस जयशंकरसँग भेटवार्ता गर्ने कार्यक्रम छ ।
देउवाको आतिथ्यतामा लागि व्यवस्था गरिएको होटल आईटीसी मौर्यमा उनलाई भेट्न जयशंकर अपराह्न साढे ४ बजे आइपुग्नेछन् ।
शुक्रवार नै प्रधानमन्त्री देउवा भारतीय जनता पार्टी (भाजपा)को कार्यालयमा जाने कार्यक्रम तय भएको छ ।
शनिवार बिहान १०ः४० मा प्रधानमन्त्री देउवा राजघाट पुगेर महात्मा गान्धीको समाधिस्थलमा पुष्पगुच्छा चढाउने कार्यक्रम छ ।
त्यसपछि प्रधानमन्त्री देउवा र भारतीय समकक्षी नरेन्द्र मोदीबीच हैदरावाद हाउसमा भेटवार्ता हुनेछ । त्यसका लागि देउवा ११ बजेर १० मिनेटमा हैदरावाद हाउस पुग्नेछन् ।
मध्याह्न १२ः१५ मा हैदरावाद हाउसमा नै दुईपक्षीय सम्झौता आदानप्रदान र प्रधानमन्त्रीहरूले संयुक्तरूपमा प्रेस वक्तव्य जारी गर्ने कार्यक्रम तय भएको छ ।
शनिवार दिउँसो साढे ४ बजे भारतका उपराष्ट्रपति वेन्कैया नायडूसँग प्रधानमन्त्री देउवाको भेटवार्ता हुनेछ ।
आइतबार बिहान ९ बजे प्रधानमन्त्री देउवा बनारसमा आयोजित कार्यक्रममा सहभागी हुन त्यसतर्फ प्रस्थान गर्ने कार्यक्रम रहेको छ ।
अपराह्न ४ बजे उनी दिल्ली फर्किसक्ने र सवा ४ बजे काठमाडौं फर्कने कार्यक्रम तय भएको छ ।
