२९ असार २०८३, सोमबार
गुल्मीको धुर्कोट गाउँपालिका जनाधारको हिसाबमा नेकपा (माओवादी केन्द्र) कमजोर छ ।
एमाले र कांग्रेस बराबरजस्तै भएको पालिकामा माओवादीलाई भने ‘लट्री’ पर्दै आएको छ ।
गत निर्वाचन (२०७४) मा माओवादी र नेपाली कांग्रेस मिलेर एमालेविरुद्ध मोर्चाबन्दी गरेका थिए । माओवादी केन्द्रका भूपाल पोखरेल अध्यक्ष र कांग्रेसका शिव केसी उपाध्यक्षमा निर्वाचित भएका थिए ।
अहिले फेरि देशभर सत्तारूढ गठबन्धन तालमेल भए पनि धुर्कोटमा फरक दृश्य देखिएको छ । पालिकामा अहिले एमाले र माओवादी केन्द्रबीच तालमेल गरी पुनः अध्यक्षमा पोखरेल दोहोरिएर उम्मेदवार बनेका छन् ।
गाउँपालिकाको उपाध्यक्षमा एमालेबाट सीता गिरीलाई अगाडि सारिएको छ । कांग्रेसबाट अध्यक्षको उम्मेदवार महेन्द्र भण्डारी र उपाध्यक्षमा कमला सुनार उम्मेदवार छन् । सुनार नेकपा एकीकृत समाजवादीबाट उम्मेदवार बनेकी हुन् ।
‘भाग्यमानी’ उम्मेदवार पोखरेल एमाले र माओवादीको मतबाट जित्ने जिल्लाका नेताहरू बताउँछन् ।
नेकपा एमाले गुल्मी अध्यक्ष बालसिंह काउछाले आसन्न स्थानीय तह निर्वाचनका लागि एमाले र माओवादी केन्द्रका बीचमा तालमेल गरिएको जानकारी दिए । धुर्कोटमा गाउँपालिका अध्यक्षका लागि एमालेबाट गोपाल कुँवर उम्मेदवार थिए । कुँवरले उम्मेदवारी फिर्ता गरेर पोखरेललाई समर्थन गरेर अगाडि बढेको काउछाले बताए ।
एमाले र माओवादी केन्द्रबीच तालमेल भएपछि एमालेबाट उम्मेदवारी दिएका कुँवरले उम्मेदवारी फिर्ता लिएका थिए ।
गाउँपालिका अध्यक्षमा एमालेले माओवादीलाई समर्थन गरेपछि उपाध्यक्षमा भने माओवादीले एमाले उम्मेदवार सीता गिरीलाई समर्थन गर्ने भएको छ ।
सहमतिअनुसार सात वडा रहेको धुर्कोटमा वडा नम्बर १ र ४ मा वडाध्यक्ष माओवादी केन्द्रबाट र बाँकी रहेका अन्य वडामा एमालेबाट वडाध्यक्षका उम्मेदवार छानिएका छन् ।
पोखरेल निर्वाचित भएपछि विकास निर्माणका कामसँगै किसान, महिला, युवालगायतका क्षेत्रमा उल्लेखनीय काम गरेको स्थानीयवासी बताउँछन् ।
