प्रधानमन्त्री शेरबहादुर देउवाको गाउँमा शेरबहादुर नै शेरबहादुर भेटिएका छन् । 

देउवा थरका शेरबहादुर मात्रै १३ जना छन् । यो गाउँमा अन्य थरका १० शेरबहादुरसहित एउटै गाउँमा २३ जना शेरबहादुर छन् । 

शेरबहादुर नै शेरबहादुरको भीडमा कुन चाहिँ प्रधानमन्त्री देउवा हुन् भनेर झट्ट छुट्याउन गाह्रो पर्छ । २७ वर्षको युवा शेरबहादुरदेखि ७७ वर्षसम्मका वृद्ध शेरबहादुर गरी दुई दर्जन शेरबहादुर एउटै गाउँमा छन् । 

प्रधानमन्त्री देउवा कुन हुन् भनेर पत्ता लगाउन निर्वाचन आयोगको मतदाता सूचीमा रहेको उनको बुबाआमा र श्रीमतीको नामसँग भिडाउनुपर्छ । 

७६ वर्षीय प्रधानमन्त्री देउवाका बुबा प्रसाद सिंह र आमा द्रोपती हुन् । उनको श्रीमतीको नाम आरजु देउवा राणासमेत उल्लेख भएकोले सोही नामबाट खोज्नुपर्छ ।

प्रधानमन्त्री देउवा, उनकी श्रीमती आरजु र छोरा जयवीर सिंहको पनि डडेल्धुरामै मतदाता नामावली छ । यसपटकको चुनावमा मतदान गर्न देउवा डडेल्धुरा पुगिसेकका छन् ।

प्रधानमन्त्रीको गाउँ गन्यापधुराको रुवाखोला हो । उनको गाउँमा २७ वर्षीय अविवाहित युवा शेरबहादुरदेखि अरू थरका पनि शेरबहादुर छन् । 

प्रधानमन्त्री देउवाले भोलि (शुक्रवार) हुने स्थानीय तह निर्वाचनका लागि गन्यापधुरा गाउँपालिकाको असिग्राम माविस्थित रुवाखोलामा तोकिएको मतदान केन्द्र पुगेर मतदान गर्नेछन् । 

निर्वाचन आयोगका अनुसार गन्यापधुरामा १० हजार ४१४ जना मतदाता छन् । प्रधानमन्त्री देउवाले विद्यालय तह अध्ययन गरेको पनि यही असिग्राम मावि नै हो ।

गन्यापधुरा गाउँपालिका १ का वडा अध्यक्ष चेतराम भट्टका अनुसार अन्य ठाउँमा राम, श्याम भनेजस्ते बढी प्रयाेग हुने सामान्य नभएकाेले धेरैकाे नाम शेरबहादुर भएकाे हाे । प्रधानमन्त्री भएर उनैकाे जस्ताे राजनीतिमा सफल हुन राखिएकाे नाम शेरबहादुर नभएकाे पनि भट्टले बताए । नयाँ पुस्ता धेरै नभएर पुराना पुस्ता र प्रधानमन्त्री देउवाकै समकालीनहरुकाे नाम शेरबहादुर नै भएकाे जानकारी भट्टले दिए ।