३१ जेठ २०८३, आइतबार
राजनीतिक दलीय किल्ला भत्काउँदै धनगढी उपमहानगरमा स्वतन्त्र उम्मेदवार गोपाल हमालको उदय भएको छ ।
सत्ता गठबन्धन र नेकपा एमालेका उम्मेदवारलाई फराकिलो मतान्तरले हराउँदै धनगढी उपमहानगरपालिकाको मेयर हमालमा निर्वाचित भएका छन् ।
सत्ता गठबन्धनका तर्फबाट नेपाली कांग्रेसबाट उम्मेदवारी दिएका निवर्तमान मेयर नृपबहादुर वडलाई. १२ हजार ४८ .मतले हराउँदै उनी विजयी भएका छन् । हमालले २६ हजार ८६५ मत पाएका छन् भने वडले १४ हजार ८१७ मत पाए । नेकपा एमालेका उम्मेदवार रणबहादुर चन्द ९ हजार ११५ मतका साथ तेस्रो स्थानमा खुम्चिन पुगेका छन् ।
उपमेयरमा नेकपा एमालेकी कन्दकला राना विजयी भएकी छिन् । सत्ता गठबन्धनका तर्फबाट नेकपा माओवादी केन्द्रबाट उम्मेदवारी दिएकी शान्ति अधिकारी क्षेत्रीलाई २ हजार ८०९ मतले पराजित गर्दै उनी विजयी भएकी छन् । रानाले १५ हजार ४७९ मत प्राप्त गरेकी छन् भने अधिकारीले १२ हजार ६७० मत पाएकी छन् ।
९३ हजार १५१ मतदाता रहेका धनगढीमा जम्मा ६८.०४ प्रतिशत अर्थात् ६३ हजार ७१५ मत खसेको थियो ।
यसअघि को–को जिते धनगढी क्षेत्रमा ?
सुदूरपश्चिम प्रदेशको एक मात्र उपमहानगरपालिका धनगढीमा २०४६ सालको राजनीतिक परिवर्तनपछि भएको पहिलो स्थानीय चुनावमा नेपाली कांग्रेसले प्रमुख, उपप्रमुखसहित अधिकांश वडामा जीत हासिल गरेको थियो । २०५४ सालमा एमाले विजयी भएको थियो ।
धनगढी उपमहानगरपालिका सहितको तत्कालीन ३ नम्बर क्षेत्रमा २०४८ सालको आम निर्वाचनमा कांग्रेस विजयी भएको थियो भने २०५१ सालको मध्यावधि निर्वाचनमा एमालेले जितेको थियो ।
२०५६ सालको प्रतिनिधिसभा सदस्य निर्वाचनमा पुनः कांग्रेसले जीत हासिल गरेको थियो । २०६२/०६३ को दोस्रो जनआन्दोलनपछिको पहिलो संविधानसभा सदस्य निर्वाचन २०६४ मा धनगढीसहितको ६ नम्बर क्षेत्रबाट माओवादी केन्द्र विजयी भएको थियो ।
संविधान सभाको दोस्रो निर्वाचन २०७० मा ६ नम्बर क्षेत्रबाट नेपाली कांग्रेसका सभापति शेरबहादुर देउवा विजयी भएका थिए । निर्वाचनमा देउवा डडेल्धुराबाट पनि निर्वाचित भएका थिए ।
निर्वाचनपछि देउवाले कैलाली–६ छाडेपछि भएको उपनिर्वाचनमा नेपाली कांग्रेसबाट पुस्करनाथ ओझा विजयी भएका थिए । २०७४ सालको संघीय निर्वाचनमा धनगढी सहितको ५ नम्बर क्षेत्रबाट एमालेका नारदमुनि राना विजयी भएका थिए ।
२०७४ सालको मत परिणाम
२०७४ सालको निर्वाचनमा नेपाली कांग्रेसबाट उम्मेदवार बनेका वड १४ हजार ३२४ मत ल्याई बिजयी भएका थिए । उनका निकटतम प्रतिद्वन्द्वी हालका नवनिर्वाचित मेयर हमालले ११ हजार ५२७ मतमा चित्त बुझाउनुपरेको थियो । नेकपा माओवादी केन्द्रका उम्मेदवार रामसमझ राना १० हजार २०९ मत ल्याउँदै तेस्रो स्थानमा थिए भने एमालेका उम्मेदवार दुर्गा जोशी ९ हजार ९४६ मतमा सीमित भएका थिए । राप्रपाका विष्णु शाहले ८२८ मत, मधेशी जनाधिकार फोरमका प्रेमकुमार बिसीले ४५९ मत र जनमोर्चाका कृष्णप्रसाद चौधरीले २१६ मत प्राप्त गरेका थिए ।
अघिल्लो निर्वाचनमा धनगढीका जम्मा मतदाता ७६ हजार ४३० जना थिए । त्यसताका ८७.११ प्रतिशत मत खसेको थियो भने २ं.११ प्रतिशत मत बदर भएको थियो ।
