पाल्पामा हुन लागेको एक महोत्सवमा कलाकारहरूलाई थाहै नदिई उनीहरूको फोटो प्रयोग गरेर प्रचार–प्रसार गरेको पाइएको छ । माथागढी गाउँपालिका–३ सराईमा हुन लागेको ‘प्रथम सराई महोत्सव–२०७९’मा कलाकारहरूलाई जानकारी नगराई पोष्टरमा उनीहरूको फोटो प्रयोग गरेको पाइएको हो । सराई युवा क्लबको आयोजनामा भदौ २३ देखि असोज ६ गतेसम्म महोत्सव हुन लागेको जनाइएको छ । 

बिहीवार महोत्सवको एक पोष्टर सार्वजनिक गरिएको छ । जसमा मुख्य आकर्षणहरू भन्दै प्रकाश सपूत, प्रमोद खरेल, बद्री पंगेनी, कुलेन्द्र विश्वकर्मा, लाहुरेदेखि रचना रिमाल, एलिना चौहानसम्मका २ दर्जन बढी कलाकारहरूको तस्वीर राखिएको छ । यीमध्ये अधिकांश कलाकारलाई उक्त महोत्सवबारे जानकारी नै नभएको पाइएको हो । महोत्सवबारे धेरै कलाकारहरूसँग बुझ्दा उनीहरूले अनविज्ञता प्रकट गरे । 

बिहीवार एक्कासी मेलाको पोष्टर देखेर आफू आश्चर्यमा परेको एक गायकले बताए । ‘मलाई त यसबारे केही जानकारी छैन । पोष्टरमा फोटो देख्दा म आफैँ अचम्ममा परेको छु’ उनले लोकान्तरसँग भने । अर्की एक गायिकाले उक्त महोत्सवका लागि कसैसँग कुरा नभएको बताइन् । पोष्टरमा फोटो प्रयोग भएकामध्ये आधा दर्जन कलाकारहरूसँग बुझ्दा सबैले आफूसँग महोत्सवबारेमा कुरा नभएको प्रतिक्रिया दिए ।

पोष्टरमा उल्लेख भएअनुसार महोत्सवको समन्वयकर्तामा माथागढी गाउँपालिका छ । त्यस्तै मेला व्यवस्थापकमा सिद्धबाबा एक्जिबिसन र सहयोगीमा ए एण्ड ए म्यानेजमेण्ट प्रालि छ । 

आयोजक सराई युवा क्लबका अध्यक्ष कृष्ण सारुले महोत्सव व्यवस्थापनको जिम्मा सिद्धबाबा एक्जिबिसनलाई रहेकोले आफूलाई कलाकारहरूको विषयमा जानकारी नभएको बताए । ‘सम्पूर्ण जिम्मेवारी उहाँहरूलाई हो । हामीले कागजी प्रक्रिया र उहाँहरूलाई अन्य आवश्यक सहयोग गर्ने हो । त्यसबापत क्लबलाई केही रकम दिने सम्झौतामा महोत्सव हुन लागेको हो’ सारुले लोकान्तरसँग भने । 

महोत्सवको घाटा–नाफासँग पनि क्लबलाई सरोकार नभएको समेत उनले बताए । ‘हामीले महोत्सव गरेबापत उहाँहरूले केही रकम छुट्टयाउने भनेर सम्झौता गरिएको हो’, उनले भने । घाटा भए पनि आफूहरूलाई असर नहुने र क्लबलाई केही आर्थिक सहयोग होला भन्ने अपेक्षाले महोत्सवको तयारीमा लागेको उनले बताए । 

‘मेलाको अनुमति दिलाइ दिएकोमा क्लबलाई केही रकम दिने भनेर क्लब आयोजक बनेको हो’, उनले भने, ‘कलाकारहरूदेखि लिएर स्टल व्यवस्थापन सबै जिम्मा जिम्मा उहाँहरूको हो । उहाँहरूले कलाकारहरूसँग कुरा गर्दै हुनुहुन्छ कि !’