दशैंको समयमा पनि सोचेजस्तो व्यापार नहुँदा न्युरोडका व्यापारीहरू चिन्तित बनेका छन् । काठमाडौंको असन तथा न्युरोड क्षेत्रका व्यापारीहरू दशैंको मुखमा पनि सोचेअनुसारको व्यापार नहुँदा निराश बनेका हुन् । 

हिन्दू नेपालीहरूको चाड बडादशैंको समयमा गत वर्षमा ग्राहकहरूको ठेलामठेल हुने असन र न्युरोड बजार अहिले शून्यप्रायः छन् । केही चहलपहल त छ तर सोचेअनुसारको चहलपहल भने हुन नसकेको व्यापारीहरूको गुनासो छ । गत वर्षहरूमा न्युरोड क्षेत्रमा हिँड्नेसमेत ठाउँ नहुने गरेर मानिसहरू किनमेलका लागि आउने गरे पनि यसवर्ष भने कम मात्रै आइरहेको उनीहरूले बताए । 

कोरोना महामारीपछि व्यापार व्यावसायहरू राम्रोसँग फस्टाउन सकेको छैन । साथै नेपालीहरूले पनि आफ्नो कोरोनाकै कारण चाडबाड राम्रोसँग मनाउन सकेका छैनन् । यसवर्ष कोरोना महामारीको असर कम रहे पनि डेंगुको संक्रमणका कारण पुनः दैनिक जनजीवन अस्तव्यस्त बनेको छ । चाडबाड नजिकिँदै गरिरहेको अवस्थामा देशभर डेंगुका बिरामीहरू दिनप्रतिदिन बढिरहेका छन् । जसका कारण पनि आम मानिसहरू बजारमा त्यत्ति देखिँदैनन् । 

चाडबाडमा नयाँ लुगा, नयाँ परिकार खानका लागि पनि अनलाइनबाट नै होम डेलिभरी हुनाले भौतिक रूपमा नै उपस्थित भएर सामान किनबेच गर्नेको संख्या कम हुँदै गएको सहजै आकलन गर्न सकिन्छ । कोरोनाका कारण आम मानिसको आर्थिक अवस्था पनि कमजोर भएकाले बजारमा ग्राहकहरूको चहलपहल कम भएको हुनसक्ने न्युरोडस्थित कपडा पसलका व्यापारी दिनेश साहीले बताए । उनले विगतका वर्षहरूको तुलनामा यस वर्ष कमैमात्र व्यापार भएको बताए । 

त्यस्तै न्युरोडमा नै जुत्ता, चप्पलको व्यापार गर्दै आएका उद्धव ढुंगेलको पनि भनाइ फरक छैन । सोचेअनुसारको व्यापार नहुँदा पसल भाडा तिर्नपनि हम्मेहम्मे परेको उनले बताए । उनले विगतका वर्षहरूमा हिँड्ने बाटो नहुने न्युरोड यसपटक भने खुला भइरहेको अनुभव गरेको बताए । 

दशैं नजिकिएसँगै व्यापार पनि होला भन्ने सोचले सामान ल्याएको तर ग्राहक नआउँदा आफूहरू अहिले समस्यामा परेको ब्यापारीहरूको भनाइ छ । कोरोना भाइरस र बढ्दो डेंगुका कारण पनि नागरिकहरू घरभित्रै भएकाले पनि दशैंको सामान किन्न खासै बजार निस्किएका छैनन् । ग्राहकलाई आकर्षण गर्न व्यापारीले विभिन्न सामानमा छुटको व्यवस्था गरे पनि त्यसमा ग्राहकको आकर्षण कम देखिएको छ ।