भुजुङ हाइड्रोपावर लिमिटेडले साधारण शेयर सर्वसाधारणहरूमा निष्काशन गर्नको लागि कुमारी क्यापिटल लिमिटेडलाई धितोपत्र निष्काशन तथा बिक्री प्रबन्धकमा नियुक्त गरेको छ । प्रति शेयर १०० रूपैयाँ अंकित दरको ५ लाख ८५ हजार कित्ता शेयर निष्काशनका लागि कुमारीलाई बिक्री प्रबन्धक नियुक्त गरिएको हो । 

उक्त सम्झौता—पत्रमा भुजुङ हाइड्रोपावरका तर्फबाट कार्यकारी सञ्चालक खेमराज जोशी तथा कुमारी क्यापिटलका तर्फबाट कायममुकायम प्रमुख कार्यकारी अधिकृत पुष्प शर्माले हस्ताक्षर गरे । हाल भुजुङ हाइड्रोपावर लिमिटेडको अधिकृत पूँजी रु. ५० करोड रूपैयाँ, जारी पूँजी रु. ४३ करोड रूपैयाँ, र चुक्ता पूँजी रु. ३२.७२५ करोड रूपैयाँ रहेको छ । 

सन् २०१५ मा स्थापित भुजुङ हाइड्रोपावरले ७.५ मेगावाट क्षमताको रन अफ रिभर प्रकारको अपर मिडिम हाइड्रोपावर प्रोजेक्ट विकास गरिरहेको छ । आयोजनाको कुल लागत रु. ३९ करोड रहेको छ भने कम्पनीले आयोजनाको कुल लागतको १५ प्रतिशत अर्थात रु. ५.८५ करोडको साधारण शेयर सर्वसाधारणहरूमा निष्काशन गर्न लागेको हो । यो आयोजना लमजुङ जिल्लाको क्व्होलासोथार गाउँपालिकामा अवस्थित छ ।